झापा, माघ २१ । नेपाली कांग्रेस झापा–५ क्षेत्रीय कार्यसमितिले निर्वाचनका सन्दर्भमा अन्य कुनै दलसँग गठबन्धन हुने भन्ने चर्चालाई पूर्ण रूपमा अस्वीकार गर्दै त्यसलाई ‘भ्रामक र कपोलकल्पित’ भन्यो। क्षेत्रीय सभापति ढुण्डिराज भण्डारीले बुधबार एक विज्ञप्ति जारी गर्दै सामाजिक सञ्जालमार्फत फैलाइएका यस्ता अफबाहले कार्यकर्ता र मतदातामा भ्रम सिर्जना गर्न खोजेको प्रति पार्टीको गम्भीर ध्यानाकर्षण भएको उल्लेख गरे।
पार्टी सभापति गगनकुमार थापाले निर्वाचनअघि कुनै पनि दलसँग चुनावी तालमेल नहुने स्पष्ट पारिसकेको सन्दर्भमा कांग्रेस आफ्नो सोही प्रतिबद्धतामा अडिग रहेको विज्ञप्तिमा जनाइएको छ। आगामी फागुन २१ गते हुने प्रतिनिधि सभा निर्वाचनमा पार्टीका उम्मेदवार मन्धरा चिमोरिया पौड्याललाई अत्यधिक मतले विजयी गराउन सम्पूर्ण कार्यकर्ताहरूलाई एकजुट भएर चुनावी अभियानमा लाग्न कांग्रेसले आह्वान गर्यो।
साथै, आम मतदातालाई कुनै पनि अफबाहको पछि नलागी आफ्नो चुनाव चिन्ह ‘रूख’ मा मतदान गर्न पार्टीले विशेष आग्रह गरेको छ।
