काठमाडौं, असार १८ । देशभर अहिले मनसुनी वायु सक्रिय रहेको छ। हाल गण्डकी, लुम्बिनी, कर्णाली र सुदूरपश्चिम प्रदेशमा अधिकांश स्थानमा बादल लागेको छ भने कोशी र बागमती प्रदेशमा सामान्य बदली तथा मधेश प्रदेशमा आंशिक बदली रहेको छ। बागमती र गण्डकीका पहाडी क्षेत्र तथा लुम्बिनी र सुदूरपश्चिमका केही स्थानमा मेघगर्जन र चट्याङसहित वर्षा भइरहेको छ।
मौसम पूर्वानुमान महाशाखाका अनुसार आज दिउँसो लुम्बिनी, कर्णाली, सुदूरपश्चिम, कोशी, बागमती र गण्डकी प्रदेशमा सामान्यदेखि पूर्ण बदली रहनेछ भने मधेश प्रदेशमा आंशिक बदली रहनेछ। हिमाली र पहाडी क्षेत्रका केही स्थान तथा तराईका केही क्षेत्रमा मेघगर्जन र चट्याङसहित मध्यम वर्षाको सम्भावना छ।
बागमती र गण्डकी प्रदेशका पहाडी क्षेत्रमा भारी वर्षा हुन सक्ने अनुमान गरिएको छ। सुदूरपश्चिम प्रदेशका पहाडी तथा तराईका केही स्थानमा भारीदेखि धेरै भारी वर्षाको सम्भावना रहेकाले आवश्यक सतर्कता अपनाउन मौसमविद्ले आग्रह गरेका छन्।
रातिको समयमा पनि देशभर सामान्य बदली रहनेछ। बागमती, गण्डकी, लुम्बिनी, सुदूरपश्चिम तथा कर्णालीका केही स्थान र कोशी तथा मधेश प्रदेशका एक-दुई स्थानमा मेघगर्जन र चट्याङसहित वर्षा हुने सम्भावना रहेको छ। गण्डकी र बागमतीका केही स्थानमा राति पनि भारी वर्षा हुन सक्ने महाशाखाले जनाएको छ।
