चितवन, साउन ४ । चितवनको इच्छाकामना गाउँपालिका-६ जलबिरे नजिक मुग्लिङ–नारायणगढ सडकखण्डमा आइतबार बिहान दुईवटा बस र एउटा ट्रक एकापसमा ठोक्किँदा ३३ जना यात्रु घाइते भएका छन्। बिहान करिब ७:१० बजेको समयमा तीव्र गतिका सवारीसाधनहरू एकापसमा ठोक्किएर उक्त दुर्घटना भएको प्रहरीले जनाएको छ।
दुर्घटनामा काठमाडौंबाट दाङतर्फ जाँदै गरेको लु.प्र.०३–००१ ख ०५०५ नम्बरको बस, सर्लाहीबाट काठमाडौंतर्फ जाँदै गरेको म.प्र.०३–००२ ख ७३२ नम्बरको बस र सोही दिशाबाट पछाडि आउँदै गरेको बा.प्र.०३–००१ ख १६७१ नम्बरको ट्रक एकापसमा ठोक्किएका हुन्। गुडिरहेका सवारीसाधनहरू एकापसमा ठोक्किँदा तीनवटै सवारीसाधनमा ठूलो क्षति पुगेको छ।
दुर्घटनालगत्तै स्थानीय बासिन्दा र प्रहरीको टोलीले घटनास्थलबाट घाइतेहरूको उद्धार गरी तत्काल उपचारका लागि भरतपुर पठाएको थियो। घाइते भएका ३३ जनामध्ये २४ जनाको नयाँ मेडिकल कलेज भरतपुर र ९ जनाको पुरानो मेडिकल कलेज भरतपुरमा उपचार भइरहेको छ। घाइतेहरूको अवस्थाबारे थप विवरण आउन बाँकी छ।
दुर्घटनाका कारण मुग्लिङ–नारायणगढ सडकखण्ड केही समयका लागि दुवैतर्फ पूर्ण रूपमा अवरुद्ध बनेको थियो। सडकमा रहेका दुर्घटनाग्रस्त सवारीसाधनहरूलाई प्रहरी र स्थानीयको सहयोगमा हटाएपछि अहिले उक्त सडकखण्ड दुवैतर्फ सुचारु भइसकेको छ। घटनाको बारेमा प्रहरीले आवश्यक अनुसन्धान गरिरहेको छ।
