काठमाडौं, साउन ६ । नेपाली कांग्रेसले संस्थापक नेता तथा नेपालको पहिलो जननिर्वाचित प्रधानमन्त्री बीपी कोइरालाको स्मृति दिवसका अवसरमा ‘ग्रीन रन’ प्रतियोगिता आयोजना गर्दै मानव सहायता कल्याण कोष स्थापना गर्ने घोषणा गरेको छ।
ललितपुरस्थित युएन पार्कबाट सुरु भएको पाँच किलोमिटरको दौड प्रतियोगितामा पुरुषतर्फ मुकेशबहादुर पाल प्रथम हुनुभएको छ। उहाँले निर्धारित दूरी १६ मिनेट १५ दशमलव ७ सेकेन्डमा पूरा गर्दै ५० हजार रुपैयाँ नगद पुरस्कार प्राप्त गर्नुभयो।
प्रतियोगितामा नरेन्द्रसिंह रावल दोस्रो हुँदै २५ हजार रुपैयाँ तथा सञ्जय श्रेष्ठ तेस्रो हुँदै २० हजार रुपैयाँ पुरस्कारबाट सम्मानित हुनुभयो। त्यसैगरी गणेश सिंह चौथो, अमृत ठकुरी पाँचौं र नागेश्वर अहिर छैटौं हुँदै क्रमशः १२ हजार, १० हजार र ८ हजार रुपैयाँ नगद पुरस्कार प्राप्त गर्नुभयो।
विजयी धावकहरूलाई नेपाली कांग्रेसका सभापति गगनकुमार थापाले पुरस्कार वितरण गर्नुभएको थियो। प्रतियोगितामा करिब १ हजार ४ सय जनाले नाम दर्ता गराएका थिए। महिला प्रतियोगितातर्फ भने केही सहभागीले निर्धारित धावन मार्ग छोडेर दौडिएका कारण पुनः प्रतिस्पर्धा गराइने आयोजकले जनाएको छ।
ग्रीन रनमा सभापति थापासमेत प्रतिस्पर्धीका रूपमा सहभागी हुनुभएको थियो भने सयौं अन्य सहभागीले अप्रतियोगी रूपमा दौडमा सहभागिता जनाएका थिए।
दौड प्रतियोगितापछि जावलाखेलमा जलवायु परिवर्तनसम्बन्धी विज्ञहरूको सहभागितामा अन्तरक्रिया कार्यक्रम आयोजना गरिएको थियो। पार्टीका उपसभापति विश्वप्रकाश शर्माको संयोजकत्वमा रहेको केन्द्रीय नीति, अनुसन्धान तथा प्रशिक्षण प्रतिष्ठानले आयोजना गरेको कार्यक्रममा जलवायु परिवर्तनका राष्ट्रिय प्राथमिकता, नीतिगत व्यवस्था, सचेतना र पूर्वतयारीका विषयमा छलफल भएको थियो।
कार्यक्रमलाई सम्बोधन गर्दै सभापति थापाले ग्रीन रनको उद्देश्य जलवायु परिवर्तनबारे जनचेतना फैलाउनु मात्र नभई त्यसविरुद्ध सामूहिक संकल्प व्यक्त गर्नु पनि रहेको बताउनुभयो। उहाँले जलवायु परिवर्तनका विषयमा कांग्रेसले आगामी दिनमा थप व्यापक कार्यक्रम सञ्चालन गर्ने जानकारी दिनुभयो।
सभापति थापाले बीपी कोइरालाले सात दशकअघि नै प्राकृतिक स्रोत–साधनको संरक्षण, दिगो विकास र समावेशी समाजको अवधारणा अघि सारेको स्मरण गर्दै ती मूल्य र आदर्शप्रति कांग्रेस पुनः प्रतिबद्ध रहेको उल्लेख गर्नुभयो।
कार्यक्रमका अवसरमा जलवायु परिवर्तनसम्बन्धी चित्रकला प्रतियोगिता आयोजना गर्नुका साथै सहभागीहरूलाई विभिन्न प्रजातिका बिरुवा वितरण गरिएको थियो। कांग्रेसले सानेपास्थित केन्द्रीय कार्यालयबाट बिरुवा वितरण कार्यक्रमलाई निरन्तरता दिने जनाएको छ।
मानव सहायता कल्याण कोष स्थापना
यसैबीच, नेपाली कांग्रेसले मानव सहायता कल्याण कोष स्थापना गर्ने घोषणा गरेको छ। सभापति थापाका अनुसार कोषमार्फत घरबारविहीन भएका एकल महिला तथा बालबालिकालाई सहयोग गरिनेछ।
उहाँले हाल पार्टीका सदस्यहरूबाट सङ्कलन गरिएको १० लाख रुपैयाँ कोषमा जम्मा भइसकेको र आगामी दिनमा यसलाई थप विस्तार गर्दै लगिने जानकारी दिनुभयो।
कोषको विस्तृत कार्ययोजना तथा पार्टीका आगामी राजनीतिक कार्यक्रमबारे बुधबार दिउँसो २ बजे राष्ट्रिय सभागृहमा आयोजना हुने विशेष कार्यक्रममा सार्वजनिक गरिने कांग्रेसले जनाएको छ। सोही कार्यक्रममा बीपी स्मृति दिवसको विशेष समारोह, हाल सञ्चालन भइरहेको ‘जरा अभियान’को समापन तथा नयाँ अभियानहरूको घोषणा गरिनेछ।
