चितवन, साउन १२ । मुग्लिन–नारायणगढ सडकखण्ड अन्तर्गत मुग्लिन नजिकैको खहरे खोलामा सुख्खा पहिरो खस्दा सडक पूर्ण रूपमा दुईतर्फी अवरुद्ध भएको छ।

Advertisement

पहिरो हटाउने कार्य तीव्र रूपमा अघि बढाइएको छ। सम्बन्धित निकायले घटनास्थलमा तीन वटा डोजर/हेभी मेसिन परिचालन गरी पहिरो पन्छाउने काम गरिरहेको सडक विभागले जनाएको छ। साथै, एम्बुलेन्स, दमकल लगायतका आपत्कालीन सेवाका सवारीसाधनलाई आवागमन गराउन एकतर्फी सडक सञ्चालन गर्ने प्रयास भइरहेको छ।

प्रहरी तथा सडक विभागले पहिरोका कारण रोकिएका सम्पूर्ण यात्रु तथा चालकहरूलाई धैर्य गर्न, सुरक्षाकर्मीको निर्देशन पालना गर्न तथा अनावश्यक जोखिम नलिन आग्रह गरेका छन्।

पहिरो पूर्ण रूपमा हटेपछि सडक सञ्चालनबारे थप जानकारी सार्वजनिक गरिने सम्बन्धित निकायले जनाएको छ।