काठमाडौं, साउन २७ । प्रधानमन्त्री बालेन्द्र साहलाई जलवायु परिवर्तनसम्बन्धी संयुक्त राष्ट्रसंघीय शिखर सम्मेलन (कोप–३१) मा सहभागिताका लागि निमन्त्रणा प्राप्त भएको छ। टर्कीएका राष्ट्रपति रेसेप तैयप एर्दोगानका तर्फबाट प्राप्त उक्त निमन्त्रणा परराष्ट्र मन्त्रालयले प्रधानमन्त्री तथा मन्त्रिपरिषद्को कार्यालयमा पठाइसकेको छ।
बुधबार सिंहदरबारमा बसेको राष्ट्रिय सभाको विकास, आर्थिक मामिला तथा सुशासन समितिको बैठकमा परराष्ट्र मन्त्रालयका सहसचिव कृष्णप्रसाद ढकालले सो जानकारी गराउनुभएको हो। सहसचिव ढकालका अनुसार निमन्त्रणापत्र प्रधानमन्त्री कार्यालयमा पठाइए पनि नेपालका तर्फबाट सम्मेलनमा कुन तहको सहभागिता हुने भन्नेबारे भने निर्णय हुन बाँकी छ।
जलवायु परिवर्तनसम्बन्धी बहुप्रतिक्षित कोप–३१ सम्मेलन सन् २०२६ नोभेम्बर ९ देखि २० सम्म टर्कीएको अन्ताल्यामा आयोजना हुँदैछ। नेपाल सरकारले यस सम्मेलनमा जलवायु न्याय, हानि-नोक्सानीको क्षतिपूर्ति तथा पर्वतीय क्षेत्रका मुद्दाहरूलाई सशक्त रूपमा उठाउने तयारी गरेको छ।
