काठमाडौं, साउन ३१ । नेपाल चेम्बर अफ कमर्सले र्याडिसन होटलमा ग्यासको मौज्दात बढी रहेको भन्दै सार्वजनिक रूपमा गरिएको टिप्पणीप्रति गम्भीर ध्यानाकर्षण भएको जनाएको छ। चेम्बरले अपूर्ण वा सन्दर्भविहीन जानकारीका आधारमा सार्वजनिक अभिव्यक्ति दिँदा सम्बन्धित व्यवसायको प्रतिष्ठा तथा समग्र पर्यटन उद्योगमा नकारात्मक प्रभाव पर्न सक्ने जनाएको हो।
हालै उद्योग, वाणिज्य तथा आपूर्ति मन्त्रालय तथा नेपाल आयल निगमको संयोजकत्वमा गरिएको अनुगमनपछि होटलमा ग्यासको मौज्दात अस्वाभाविक रूपमा बढी रहेको भन्ने आशयका टिप्पणी सार्वजनिक भएका थिए। त्यसप्रति प्रतिक्रिया दिँदै चेम्बरले पाँचतारे होटलहरूमा दैनिक ५० देखि ६० वटासम्म ग्यास सिलिन्डर खपत हुनु सामान्य विषय भएको स्पष्ट पारेको छ।
चेम्बरका अनुसार ठूलो क्षमताका होटलहरूमा करिब २०० हाराहारी ग्यास सिलिन्डर मौज्दात राखिनु सञ्चालनको आवश्यकता र दैनिक खपतका हिसाबले स्वाभाविक हो। व्यावसायिक प्रयोजनका लागि राखिएको मौज्दातलाई मात्र आधार बनाएर त्यसलाई अस्वाभाविक वा गैरकानुनी गतिविधिसँग जोड्नु उपयुक्त नहुने चेम्बरको भनाइ छ।
चेम्बरले कृत्रिम अभाव सिर्जना गर्ने, अवैध कारोबार गर्ने वा कानुनविपरीतका कुनै पनि गतिविधिको समर्थन नगर्ने स्पष्ट गरेको छ। तर वैध रूपमा सञ्चालनमा रहेका व्यवसायलाई निरुत्साहित गर्ने गरी गरिने अतिरञ्जित प्रचारप्रसारले लगानीको वातावरणमा प्रतिकूल असर पार्न सक्ने भएकाले सम्बन्धित निकायहरू संवेदनशील हुनुपर्नेमा जोड दिएको छ।
चेम्बरले प्रभावकारी नियमनसँगै वैध लगानी र व्यवसायिक गतिविधिलाई प्रोत्साहन गर्ने वातावरण निर्माण गर्न आवश्यक रहेको उल्लेख गरेको छ। तथ्यमा आधारित सूचना, जिम्मेवार अभिव्यक्ति र सरोकारवालाबीचको सहकार्यबाट मात्रै पर्यटन तथा आतिथ्य क्षेत्रप्रतिको विश्वास, प्रतिष्ठा र दिगो विकास सुनिश्चित गर्न सकिने चेम्बरले जनाएको छ।
