काठमाडौं, भदौ २ । संघीय सरकारअन्तर्गत कार्यरत राष्ट्रसेवक कर्मचारीले अब महिनामा दुईपटक तलबभत्ता पाउने भएका छन्। अर्धमासिक रूपमा तलबभत्ता भुक्तानी गर्ने व्यवस्था कार्यान्वयनमा ल्याउन महालेखा नियन्त्रक कार्यालयले पुनः निर्देशन दिएको छ।
महालेखा नियन्त्रक कार्यालयले आइतबार देशभरका कोष तथा लेखा नियन्त्रक कार्यालयलाई परिपत्र गर्दै कर्मचारीलाई प्रत्येक १५ दिनमा तलबभत्ता भुक्तानी गर्ने व्यवस्था मिलाउन निर्देशन दिएको हो।
अर्थ मन्त्रालयको नीतिगत मार्गदर्शन तथा चालु आर्थिक वर्षको बजेट वक्तव्यमा गरिएको व्यवस्थाअनुसार अर्धमासिक तलब भुक्तानी प्रणाली लागू गर्न लागिएको महालेखाको परिपत्रमा उल्लेख छ। नयाँ व्यवस्था कार्यान्वयनका लागि आवश्यक प्रणालीगत सुधारसमेत भइसकेको कार्यालयले जनाएको छ।
अब कर्मचारीले नियमित रूपमा पाउँदै आएको तलबभत्तासँगै कर्मचारी प्रोत्साहन भत्तासमेत अर्धमासिक रूपमा प्राप्त गर्नेछन्। महिनाको १५ दिन पूरा भएपछि सो अवधिको पारिश्रमिक भुक्तानी प्रक्रिया अघि बढाउन सम्बन्धित कोष तथा लेखा नियन्त्रक कार्यालयलाई भनिएको छ।
यसअघि अर्थमन्त्री डा. स्वर्णिम वाग्लेले वैशाख ४ गते नै नीतिगत मार्गदर्शनअनुसार प्रत्येक १५ दिनमा कर्मचारीलाई तलब भुक्तानी गर्ने व्यवस्था कार्यान्वयन गर्न निर्देशन दिएका थिए। तर, आवश्यक प्रक्रिया तथा प्रणालीगत तयारी पूरा हुन नसक्दा उक्त व्यवस्था तत्काल कार्यान्वयनमा आउन सकेको थिएन।
महालेखा नियन्त्रक कार्यालयका अधिकारीका अनुसार हाल यो व्यवस्था संघीय सरकारअन्तर्गत कार्यरत कर्मचारीमा मात्र लागू हुनेछ। प्रदेश तथा स्थानीय तहका कर्मचारीका हकमा भने सम्बन्धित प्रदेश वा स्थानीय सरकारले आवश्यक निर्णय गरी अर्धमासिक तलब भुक्तानीको व्यवस्था लागू गर्न सक्नेछन्।
नयाँ व्यवस्थाले सरकारी कर्मचारीलाई महिनामा दुईपटक नियमित आम्दानी प्राप्त गर्ने सुविधा उपलब्ध गराउनेछ।
