काठमाडौं, भदौ १६ । भोटेकोशी बाढीपछि प्रभावित क्षेत्रमा नेपाली सेनाले हवाई तथा जमिनी खोज तथा उद्धार कार्यलाई तीव्रता दिएको छ। नेपाली सेनाका अनुसार भदौ १६ गते बिहान ११ बजेसम्म हवाई साधनमार्फत २३ जनाको उद्धार गरिएको छ।
बाढीबाट प्रभावित विभिन्न जलविद्युत् आयोजनाका सुरुङमा समेत विदेशीसहितको संयुक्त खोज तथा उद्धार टोली परिचालन गरिएको छ। चिलिमे हाइड्रोको सुरुङभित्र करिब ५० मिटर, लाङटाङ हाइड्रोमा करिब १५० मिटर र अपर त्रिशूली–१ हाइड्रोको सुरुङमा करिब २०० मिटरसम्म प्रवेश गरी खोजी कार्य गरिएको नेपाली सेनाले जनाएको छ।
त्रिशूली–३ ‘ए’ आयोजनामा सुरुङको हेड फेला पारिएको छ। सुरुङभित्र कम्प्रेसरमार्फत हावा पठाउने तथा पानी निकाल्ने काम भइरहेको छ। तीनवटा एक्स्काभेटर प्रयोग गरी पछाडितर्फको वैकल्पिक मार्ग करिब १५ मिटर खोलिएको छ भने रक ब्रेकरको प्रयोग गरी सुरुङभित्र प्रवेश गर्ने स्थान बनाउने काम भइरहेको छ।
त्यस्तै, त्रिशूली–३ ‘बी’ आयोजनामा विज्ञसहितको नेपाली सेनाको टोलीले सुरुङ प्रवेश गर्ने द्वार पत्ता लगाएर एक्स्काभेटर प्रयोग गरी खन्ने काम गरिरहेको छ।
बाढीपछि तत्काल उद्धारका क्रममा विभिन्न जलविद्युत् आयोजनाबाट २७९ जनाको जीवित उद्धार गरिएको थियो। नेपाली सेनाका अनुसार रसुवागढीबाट २, माथिल्लो त्रिशूली–१ बाट ३३, माथिल्लो त्रिशूली–३ ‘ए’ बाट २२१, माथिल्लो त्रिशूली–३ ‘बी’ बाट २, मैलुङबाट ९, नुवाकोट सौर्य विद्युत्बाट ४, त्रिशूली जलविद्युत्बाट ३ र देवघाट जलविद्युत्बाट ५ जनाको उद्धार गरिएको हो।
यसैबीच, रसुवाको टिमुरेदेखि नुवाकोट, धादिङ, चितवन र नवलपरासी पूर्वसम्मका प्रभावित क्षेत्रमा नेपाली सेनाका ९ हजार २ सयभन्दा बढी सैनिक प्रत्यक्ष रूपमा परिचालन भएका छन्। उनीहरूले घाइते तथा प्रभावितको खोज तथा उद्धार, शव व्यवस्थापनमा सहयोग, अवरुद्ध सडक खुलाउने तथा आपत्कालीन उपचारलगायतका काम गरिरहेका छन्।
प्रभावित क्षेत्रका जंगल, डाँडा, खोला तथा बस्तीमा पैदल गस्तीसमेत भइरहेको छ। स्थानीय बासिन्दालाई सुरक्षा प्रत्याभूति दिलाउँदै उद्धार आवश्यकताको मूल्याङ्कन तथा प्रभावितको अवस्थाबारे जानकारी संकलन गर्ने काम भइरहेको सेनाले जनाएको छ।
प्रभावित क्षेत्रमा डिसइन्फेक्सन
बाढी प्रभावित क्षेत्रमा संक्रमण फैलिन नदिन नेपाली सेनाले विभिन्न स्थानमा डिसइन्फेक्सनको कामसमेत थालेको छ। धुन्चे बजार, श्री नं. १ सैन्य तालिम केन्द्र, त्रिशूली, देवघाट तथा परासीस्थित पृथ्वीचन्द्र अस्पतालअन्तर्गतको शव सङ्कलन केन्द्र, सुनवल–४ र मुलपानी सामुदायिक वनस्थित शव व्यवस्थापन क्षेत्रलाई डिसइन्फेक्सन गरिएको छ।
अन्य प्रभावित क्षेत्रमा पनि स्थानीय तहसँग समन्वय गरी डिसइन्फेक्सन गर्ने तयारी भइरहेको नेपाली सेनाले जनाएको छ।
