काठमाडौं, असोज ९ । नेपालीहरुको महान् चाड बडा दशैं, तिहार तथा छठ पर्वलाई लक्षित गर्दै नेपालका लागि होण्डा कारको आधिकारिक वितरक स्याकार ट्रेडिङ कम्पनी प्रा.लि.ले विशेष चाडपर्व योजना सार्वजनिक गरेको छ । कम्पनीले ‘एक्सक्लुसिभ अफर फर फेस्टिवल सिजन’ अन्तर्गत होण्डाको नयाँ कार खरिदमा ग्राहकलाई १० लाख रुपैयाँसम्मको आकर्षक नगद छुट दिने जनाएको छ ।
ग्राहकको चाडपर्वलाई थप खुसीयालीपूर्ण बनाउने उद्देश्यले ल्याइएको योजनाअन्तर्गत नयाँ कार खरिद गर्दा एक आर्थिक वर्षका लागि सडक कर र पूर्ण बीमा निःशुल्क उपलब्ध गराइने कम्पनीले जनाएको छ। यस्तै, गाडी खरिदपछिको ग्राहक अनुभवलाई सहज बनाउन पाँच वर्षसम्म निःशुल्क सर्भिसिङ र एक वर्षका लागि निःशुल्क सडक सहायता समेत प्रदान गरिनेछ ।
पुरानो गाडी साटेर नयाँ होण्डा कार खरिद गर्न चाहने ग्राहकका लागि कम्पनीले अन–द–स्पट एक्सचेन्ज सुविधा तथा आकर्षक एक्सचेन्ज बोनस को व्यवस्था गरेको छ । यसले पुरानो गाडीलाई नयाँ कारमा रूपान्तरण गर्न चाहने ग्राहकलाई थप सहज हुने कम्पनीको भनाइ छ । त्यसैगरी, नयाँ कार खरिदलाई आर्थिक रूपमा सहज बनाउन स्याकार हायर पर्चेज तथा एनआईसी एशिया बैंकसँगको सहकार्यमा आकर्षक तथा कम ब्याजदरमा फाइनान्सिङ सुविधा समेत उपलब्ध गराइएको छ ।
कम्पनीका अनुसार उक्त चाडपर्व योजना इन्द्रजात्राको दिन अर्थात् सेप्टेम्बर २५, २०२६ (शुक्रबार) देखि छठ पूजा अर्थात् नोभेम्बर १६, २०२६ (सोमबार) सम्म देशभरका होण्डा कार शोरुममा लागू हुनेछ । योजनामा सहभागी हुँदा कम्पनीले तोकेका नियम तथा सर्तहरू लागू हुने जनाएको छ । ‘ड्राईभ टु ब्राईटेन टुमारो’ भन्ने नाराका साथ ल्याइएको योजनामार्फत होण्डाका विभिन्न मोडलका कार आकर्षक छुट तथा सुविधासहित खरिद गर्न सकिने कम्पनीले जनाएको छ । कम्पनीले ग्राहकलाई नजिकैको होण्डा कार शोरुममा सम्पर्क गरी योजनासम्बन्धी थप जानकारी लिन आग्रह गरेको छ ।
