काठमाडौँ, २२ भदौ ।
सेलिब्रेटी भइसकेपछि फ्यान अर्थात् प्रशंसकको कुनै कमी हुँदैन । फ्यानमध्ये अधिकांश किशोर वयकै हुने गर्छन् । कानुनले १८ वर्षमुनिका अर्थात् नाबालिगसँग सहमतिमै राखिएको यौन सम्पर्क पनि बलात्कार हुने व्याख्या गरेको छ । नेपालमा सेलिब्रेटीमाथि नाबालिग बलात्कार आरोप एकपछि अर्को शृंखलावद्धरुपमा आउन थालेको छ ।
नायक पल साहपछि अहिले क्रिकेटर सन्दीप लामिछाने यही आरोपमा मुछिएका छन् । पलमाथिको मुद्दामा मंगलबार नवलपुर जिल्ला अदालतले साढे २ वर्ष जेल र १० लाख रुपैयाँ जरिवानाको फैसला सुनाएकै दिन क्रिकेटर लामिछानेमाथि १७ वर्षीया एक किशोरीले बलात्कार आरोपमा किटानी जाहेरी दिएकी छिन् ।
प्रहरीको अनुसन्धान सुरु
नेपाली राष्ट्रिय क्रिकेट टोलीका कप्तान सन्दीप लामिछानेमाथि जबरजस्ती करणी कसूरमा अनुसन्धान भइरहेको प्रहरी वृत्त गौशालाले बताएको छ । प्रहरीले विज्ञप्ति जारी गर्दै जिल्ला प्रहरी परिसर, काठमाडौँ र प्रहरी वृत्त गौशालाबाट संयुक्तरूपमा खटिएको प्रहरी टोलीद्वारा कप्तान लामिछानेमाथि सुक्ष्म अनुसन्धान भइरहेको जनाएको हो ।
प्रहरीका अनुसार ती किशोरीले सन्दीपले भदौ ५ गते दिनभर काठमाडौँ र भक्तपुरको विभिन्न स्थानमा लगेर काठमाडौँ ल्याई सिनामंगलको एक होटलको कोठा नम्बर ३०५ मा भदौ ६ गते बिहान साढे १२ बजे बलात्कार गरेका जाहेरी दिएकी थिइन् । उक्त जाहेरी दरखास्त दर्ता गरी पीडितलाई एकद्वार संकट व्यवस्थापन केन्द्र (ओसिएमसी) मा लगी विस्तृत स्वास्थ्य परीक्षण गराइएको पनि प्रहरीले जनाएको छ ।
आफ्ना एक साथीसँग गौशाला पुगेकी पीडितले आफूलाई कप्तान लामिछानेले दुईपटक बलात्कार गरेको गौशालाका प्रहरीसमक्ष बताएकी थिइन् । प्रहरीका अनुसार उनको उमेर १७ वर्षको छ । त्यसपछि गौशाला प्रहरीले काठमाडौं प्रहरी प्रमुख भरतबहादुर बोहोरालाई त्यसबारे जानकारी गराएको थियो । बोहोरा हुँदै यो सूचना प्रहरी नेतृत्वसम्म पुगेको थियो । ‘बलात्कार जस्तो घटनामा प्रहरी संवेदनशील छ, हिजै स्वास्थ्य परीक्षण गराएर प्रारम्भिक अनुसन्धान थालिसक्यौं,’ उपत्यका प्रहरी कार्यालय रानीपोखरीका प्रमुख रवीन्द्रबहादुर धानुक भन्छन् ।
गौशाला प्रहरीका एक अधिकृतका अनुसार काठमाडौंको एक कलेजमा अध्ययनरत पीडित युवती लामिछानेकी ‘फ्यान’ थिइन् । उनीहरुबीच सामाजिक सञ्जाल स्न्यापच्याट र ह्वाट्स एपमार्फत कुराकानी हुने गरेको थियो । सामाजिक सञ्जालमार्फत नै लामिछानेले उनीसँग भेट्ने प्रस्ताव राखेका थिए ।
‘पीडित उनको फ्यान भएकाले म्यानिपुलेट गरेको जस्तो देखिन्छ’ गौशाला प्रहरीका ती अधिकृत भन्छन्, ‘प्रायजसो स्न्यापच्याटमै कुरा हुने रहेछ ।’ स्न्यापच्याटमा संवाद पठाएको हेर्ने वित्तिकै आफैं डिलिट हुन्छ ।
राति लठ्याएर दुई पटक बलात्कार
लामिछाने ६ भदौमा टी-२० सिरिज खेल्न केन्या गएका थिए । त्यसको अघिल्लो दिन उनले पीडितलाई पिंगलास्थानस्थित होटल काठमाडौं इनमा बोलाएर दुईपटक बलात्कार गरेको पीडितको भनाइ छ ।
‘केन्या जानु अघिल्लो दिन सन्दीप आफ्नो कारमा मध्य बानेश्वरस्थित होस्टल नजिकै लिन आएको थियो’ उनले प्रहरीसमक्ष भनेकी छन्, ‘त्यतिबेला भक्तपुर गएका थियौं, फर्किएर आउँदा मध्यराति भइसकेको थियो ।’
उनले सन्दीपलाई राति ८ बजेपछि होस्टल बन्द भइसक्ने बताएकी थिइन् । तर सन्दीपले ‘एकछिन–एकछिन’ भन्दै ढिला गरेको पीडितको भनाइ छ ।
झण्डै ११ बजिसकेपछि सन्दीपले होटलमा बस्ने प्रस्ताव गरेको उनको बयान छ । त्यसपछि सन्दीपले उनलाई पिंगलास्थानस्थित होटलमा लगेका थिए । पीडितले दुईवटा कोठा लिन भने पनि सन्दीपले नमानेको प्रहरीको भनाइ छ ।
राति लठ्याएर दुई पटक बलात्कार गरेको पीडितको जाहेरीमा उल्लेख छ । प्रहरीले पिंगलास्थान र नगरकोटमा गएको होटलको सीसीटीभी फुटेज पनि संकलन गर्न थालेको छ । होटलका कर्मचारीहरुसँग पनि सोधपुछ गरिरहेको छ । प्रारम्भिक जाँचमा उनी ५ भदौमा ती स्थानमा पीडितसँग गएको देखिएको प्रहरीले जनाएको छ ।
नेपाल क्रिकेट संघ (क्यान) २०७८ पुस ४ गते २४ वर्षीय लामिछानेलाई राष्ट्रिय क्रिकेट टिमको कप्तान नियुक्त गरेको थियो । भदौ ६ गते लामिछाने टी–२० सिरिज खेल्न केन्या गएका थिए । केन्यामा पाँच खेलको टी–२० सिरिज खेलेपछि उनी वेस्ट इन्डिजमा भइरहेको क्यारेबियन प्रिमियर लिग खेल्न गएका थिए । अनुसन्धानका लागि आवश्यक परेको अवस्थामा सन्दीपलाई इन्टरपोलको सहयोगमार्फत नेपाल झिकाइने पनि प्रहरीले जनाएको छ ।
क्यानले प्रहरीलाई सहयोग गर्ने
१७ वर्षीया नाबालिगलाई बलात्कार आरोप लागेका नेपाली राष्ट्रिय क्रिकेट टोलीका कप्तान सन्दीप लामिछानेको विषयमा अनुसन्धान गर्न प्रहरीलाई सहयोग गर्ने नेपाल क्रिकेट संघ (क्यान) ले बताएको छ।
क्यानका अध्यक्ष चतुरबहादुर चन्दले सन्दीपमाथिको आरोप गम्भीर भएकाले अनुसन्धानमा सहयोग गर्ने बताए। हाल धनगढीमा रहेका चन्द यहीँ विषयमा छलफल गर्न बुधबार साँझ काठमाडौं आइपुग्दैछन् । गम्भीर आरोप लागेपछि निलम्बन वा बर्खास्त गर्न सकिने विषयमा क्यानले अनौपचारिक छलफल गरिरहेको छ।
क्यानका कार्यवाहक सचिव प्रशान्त मल्लका अनुसार अध्यक्ष चन्द साँझ काठमाडौं आइपुगेपछि औपचारिक रूपमा छलफल हुनेछ । तत्काल निर्णय लिनका लागि क्यानको कार्यसम्पादन समितिको बैठक बस्ने पनि उनले जानकारी दिए । ‘हामी अनुसन्धानमा प्रहरीलाई सहयोग गर्छौं,’ उनले भने, ‘क्यानले पनि बैठक बसेर एउटा निर्णय लिन्छ ।’
