चितवन, १६ पुस ।
आफूविरुद्ध अदालतमा आठ वटा मुद्दा चलिरहेको बेला राष्ट्रिय एकताका लागि जीवन अर्पण गर्न तयार भएर नेपालका प्रथम जननिर्वाचित प्रधानमन्त्री बी.पी. कोइराला राष्ट्रिय एकता तथा मेलमिलापको नीति लिई स्वदेश फर्किएको दिनको सम्झनामा शनिबार चितवनमा राष्ट्रिय एकता तथा मेलमिलाप दिवस मनाइएको छ ।
२०३३ साल पुस १६ गते नेपाली कांग्रेसका संस्थापक नेता बी.पी. कोइरालाको नेतृत्वमा सर्वोच्च नेता गणेशमान सिंह, नेतृ शैलजा आचार्य, नेता खुमबहादुर खड्का, रामबाबु प्रसाइँ, नीलाम्बर पन्थीलगायत राष्ट्रिय एकता तथा मेलमिलापको नीति लिई करिब आठ वर्ष लामो निर्वासित जीवन त्याग गरी स्वदेश फर्किएका थिए । त्यही दिनको सम्झनामा मेलमिलाप दिवस मनाइन्छ ।
नेपाली काँग्रेस जिल्ला कार्य समिति चितवनले आयोजना गरेको कार्यक्रममा काँग्रेसका केन्द्रीय नेता अर्जुननरसिंह केसी प्रमुख अतिथि थिए । प्रमुख अतिथि केसीले सत्तामा नबसे पनि कांग्रेसले व्यवस्था जोगाउने कुरामा मुख्य भूमिका खेल्नु पर्ने बताए । उनले विकासको काममा विशेष चासो दिनु पर्ने बताउँदै सत्ता होइन जनतालाई केन्द्रमा राख्नु पर्ने विचार व्यक्त गरे । “अब कांग्रेसलाई बलियो बनाउन एक भएर अगाडि बढ्नु पर्छ” नेता केसीले भने ।
अर्थविद् एवं नेपाली काँग्रेसका युवा नेता स्वर्णीम वाग्लेले देशको अर्थतन्त्र जोगाउन धैर्यतापूर्वक सबै जना लाग्नुपर्ने बताए । उनले भने, “देशमा अर्थव्यवस्था सुधार भए अर्थतन्त्रमा सुधार हुन्छ । अर्थतन्त्रमा सुधार भए विकासले गति लिन्छ । सबै नेपालीको आयमा वृद्धि हुन्छ ।” देशमा विद्यमान बेरोजगारीको समस्या हल गर्न देशमा खुल्ला अर्थव्यवस्था जरूरी भएको उनको भनाइ थियो ।
पूर्वसांसद एवं नेपाली काँग्रेस चितवनका पूर्वसभापति रामकृष्ण घिमिरेले बी.पी.को विचार आज पनि सान्दर्भिक रहेको बताए । उनले कांग्रेसले बी.पी.को विचार बोक्न छाड्यो कि भन्ने चर्चा चल्न थालेको भन्दै यसप्रति सबै सजग रहनु पर्ने धारणा राखे ।
नेपाली काँग्रेस चितवन जिल्ला सभापति राजेश्वर खनालको अध्यक्षतामा सम्पन्न कार्यक्रममा नवनिर्वाचित सांसदहरु शान्ति परियार, अञ्जनी श्रेष्ठ, उत्तम जोशी, गीता गुरूङ, बिनु रायमाझी र माया श्रेष्ठलाई बधाईसहित सम्मान गरिएको थियो ।
