सूर्यप्रकाश कँडेल
भरतपुर ७ भदौ
चितवन निवासी उमेश श्रेष्ठ मूलतः शिक्षा क्षेत्रका व्यवसायी हुन् । पछिल्लो समय उनले अस्पतालदेखि हाइड्रोपावरसम्ममा लगानी बिस्तार गरेका छन् । वित्तीय क्षेत्र र पर्यटन व्यवसायमा समेत हात हालेका श्रेष्ठको जन्म २०१२ सालमा भोजपुरमा भएको हो । एक दशकयता राजनीतिमा सक्रिय श्रेष्ठ प्रधानमन्त्री कार्यालय हेर्ने जिम्मेवारीमा राज्यमन्त्री छन् । यसअघि उनी स्वास्थ्य राज्यमन्त्री थिए ।
भरतपुर महानगरपालिका ५, यज्ञपुरीमा ३२ वर्षअघि घर बनाएका श्रेष्ठको झम्सीखेल ललितपुरमा पनि बसोबास छ । उनी कांग्रेसमा दोस्रो पटक समानुपातिक कोटाबाट सांसद बनेका हुन् । यसअघि उनी संविधानसभा सदस्य थिए । मंसिर ४ गते हुन गइरहेको आमनिर्वाचनमा श्रेष्ठले प्रतिनिधिसभा सदस्य पदमा प्रत्यक्षतर्फ निर्वाचन लड्ने चाहना व्यक्त गरेका छन् । मंगलबार भरतपुरस्थित निवासमा नवीन खबर डटकमसँग विशेष कुराकानी गर्दै राज्यमन्त्री श्रेष्ठले आगामी आमनिर्वाचनमा चितवनबाटै निर्वाचन लड्ने खुलासा गरेका हुन् ।
दोस्रो संविधानसभा सदस्यका रुपमा राजनीतिमा प्रवेश गरेका श्रेष्ठ हाल नेपाली कांग्रेसका केन्द्रीय सदस्य छन् । चितवनको माडीबाट निर्विरोधरुपमा महाधिवेशन प्रतिनिधि बनेका श्रेष्ठ कांग्रेसको महासमिति सदस्य पनि हुन् । आगामी निर्वाचनमा प्रतिनिधिसभा सदस्यका लागि चितवनको क्षेत्र नम्बर १ वा २ बाट आफ्नो उम्मेदवारी रहने श्रेष्ठ बताउँछन् । निर्वाचनमा पाँचदलीय सत्ता गठबन्धन कायम रहने भएकोले चितवन क्षेत्र नम्बर ३ बाट नेकपा (माओवादी केन्द्र) का अध्यक्ष पुष्पकमल दाहाल प्रचण्डको उम्मेदवारी रहने श्रेष्ठले संकेत गरे । उनले क्षेत्र नम्बर १ वा २ बाट आफ्नो उम्मेदवारी रहने बताए ।
“३ नम्बर क्षेत्रबाट प्रचण्डजी नै उठ्ने कुरा छ” राज्यमन्त्री श्रेष्ठ भन्छन्, “मेरो प्राथमिकता भनेको २ नम्बर क्षेत्र हो । २ नम्बर नमिलेमात्रै १ नम्बरबाट उठ्छु । पार्टी सभापति र केन्द्रीय समितिमा कुरा राखिसकेको छु ।” चितवनमा पाँचदलीय गठबन्धनको पोजिसन राम्रो रहेकोले आफ्नो जित सुनिश्चित भएको उनको दाबी छ ।
हाइड्रो र होटलमा लगानी
नेपालको शैक्षिक क्षेत्रमा मात्रै नभएर अन्य व्यवसायमा पनि श्रेष्ठको लगानी छ । उनले लिटिल एन्जल्स स्कूल खोलेर शैक्षिक व्यवसायीका रुपमा परिचय बनाए । उनी प्राइम कमर्सियल बैंकका पूर्वअध्यक्ष र मुख्य लगानीकर्ता हुन् । पछिल्लो समय जलविद्युत आयोजनामा उनको लगानी छ । उनी पाँचथर पावर कम्पनी प्रालिका अध्यक्ष हुन् । सानीगाड हाइड्रोपावर बझाङ, कालङ्गा हाइड्रो बझाङ, बुङ्गल हाइड्रो बझाङ, भिजन इनर्जी रामेछाप र माउन्टेन इनर्जी म्याग्दीमा उनको लगानी छ ।
भरतपुरमा रहेको होटल सिराइचुली, सौराहाको सेन्ट्रल पार्क रिसोर्ट, धुलिखेलको हिमालयन दृश्य रिसोर्ट र तनहुँको घाँसी हेल्थ रिसोर्टमा पनि श्रेष्ठको लगानी छ । पोखरामा उनको नयाँ होटल परियोजना सुरु भएको छ । कृषि फार्म, निजी वन विकास लगायत धेरै क्षेत्रमा उनको लगानी छ । हाउजिङ र रियल स्टेटमा समेत उनले हात हालेका छन् ।
शिक्षा र स्वास्थ्यलाई साथ
४२ वर्षअघि भोजपुरबाट काठमाडौं गएका श्रेष्ठको संलग्नता शैक्षिक, स्वास्थ्य, वित्तीय, ऊर्जा र पर्यटन क्षेत्रमा छ । संसदको शिक्षा तथा स्वास्थ्य समितिका सदस्य रहेका उनी ललितपुरको हात्तीवनमा रहेको लिटिल एन्जल्स एजुकेशन ग्रुपका संस्थापक अध्यक्ष हुन् । उनी उच्च माध्यमिक विद्यालय एसोसिएसन (हिसान) र निजी तथा आवासीय विद्यालय अर्गनाइजेसन (प्याब्सन) का पूर्वअध्यक्ष र हाल सल्लाहकार हुन् ।
भरतपुर महानगरपालिकाको आँपटारी र कल्याणपुरमा श्रेष्ठले स्मल हेभन स्कुल संचालनमा ल्याएका छन् । २०५७ सालमा आँपटारीमा खुलेको स्कुल पछि कल्याणपुरमा बिस्तार भएको हो । चितवनमा स्मल हेभनको ख्याति अहिले पनि कम छैन ।
श्रेष्ठले पछिल्लो समय स्वास्थ्य क्षेत्रमा पनि हात हालेका छन् । नेपालमा निजी अस्पतालमा लगानी गर्न सुरु गरेका श्रेष्ठले यस वर्ष नै ५० करोड रुपैयाँभन्दा बढी लगानीमा पाँच वटा निजी अस्पताल बनाउने तयारी गरेका छन् । भरतपुरमा रहेको पुष्पाञ्जली अस्पतालमा उनले लगानी गरेका छन् । उनी महेन्द्रनारायण निधि मेमोरियल सामुदायिक अस्पताल काठमाडौंको ट्रस्टीज अध्यक्ष हुन् । श्रेष्ठ काठमाडौंको बालाजुमा रहेको जनमैत्री अस्पतालको पनि अध्यक्ष हुन् ।
राज्य बलियो भयो भने शिक्षा र स्वास्थ्य निःशुल्क गर्न सकिने श्रेष्ठको धारणा छ । उनी भन्छन्, “शिक्षा र स्वास्थ्य राज्यको दायित्व हो । राज्य धनी हुनेबित्तिकै शिक्षा र स्वास्थ्य निःशुल्क हुन्छ । सरकारी संस्था राम्रो भयो भने निजी संस्था चाहिँदैन ।”
