भरतपुर, ९ भदौ
केही दिनयता गृहजिल्ला चितवनको भरतपुरस्थित निवासमा राजनीतिक भेटघाटलाई तीब्रता दिइरहेका राज्यमन्त्री उमेश श्रेष्ठ आगामी निर्वाचनमा प्रतिनिधि सभा सदस्यमा प्रत्यक्षतर्फबाट लड्न चाहन्छन् । दुई पटकसम्म समानुपातिकतर्फबाट सांसद बनिसकेका श्रेष्ठ यसपालि प्रत्यक्ष निर्वाचित सांसद बन्न खोजिरहेका छन् ।
निर्वाचनमा जित हासिल गर्न पार्टीका नेता र कार्यकर्ताको अहम् भूमिका रहन्छ भन्ने बुझेका श्रेष्ठले भरतपुरमा रहुञ्जेल नेपाली काँग्रेसका विभिन्न तहका नेता र कार्यकर्तालाई भेटिरहेका छन् । यसैक्रममा बिहीबार श्रेष्ठ निवासमा आयोजित अगुवा कार्यकर्ता भेटघाट कार्यक्रमका सहभागीले राज्यमन्त्री श्रेष्ठलाई चितवनको क्षेत्र नम्बर २ बाट चुनाव लड्न सुझाव दिएका छन् ।
भरतपुर महानगरपालिका वडा नम्बर ५ मा राज्यमन्त्री श्रेष्ठको निवास छ । यो चितवनका तीन निर्वाचन क्षेत्रमध्ये क्षेत्र नम्बर २ मा पर्छ । यसलाई फार्म हाउसका रुपमा पनि चिनिन्छ । निवासको नाम भने श्रेष्ठले सृष्टि भिल्ला राखेका छन् । यही भिल्लामा आयोजित कार्यक्रममा अगुवा कार्यकर्ताले श्रेष्ठलाई क्षेत्र नम्बर २ बाटै चुनाव लड्न भनेका छन् ।
अगुवा कार्यकर्ताहरुको कुरा सुनिसकेपछि राज्यमन्त्री श्रेष्ठले चितवनलाई समृद्ध बनाउन आफू हरतरहले लाग्ने प्रतिबद्धता जनाए । उनले शिक्षा, स्वास्थ्य र पर्यटन क्षेत्रको विकास गरेर चितवनलाई समृद्ध बनाउन सकिने विचार व्यक्त गरे । कार्यक्रममा वडा सभापति र वडा अध्यक्षसहित झन्डै सय जना नेता तथा कार्यकर्ताको उपस्थिति रहेको थियो ।
