चितवन । चितवन कांग्रेसका सभापति राजेश्वर खनाल फेरि विवादमा तानिएका छन् । कुनै न कुनै रुपमा विवादमा आउने कुरा उनको परिचय नै बनेको छ । उनी सभापति भए देखि नै कहिले आफ्नालाई टिकट दिएको, कहिले पार्टीमा मनोमानी गरेको भन्दै पटक पटक आलोचित बन्दै आएका छन । अरुको कुरा कम सुन्ने र सुने पनि नटेर्ने उनको आद्दत छ ।त्यसैले उनी पुन विवादमा तानिएका हुन् । ‘जनताको साथमा कांग्रेस अभियान शुरु’भएको भोलिपल्टै खनाल र जिल्लाका अन्य नेताबीच जुहारीनै चल्यो ।
आज जिल्लाका विभिन्न कार्यक्रममा खनालले जिल्लाका नेता कार्यकर्तालाई सामाजिक सञ्जालमा कांग्रेसका बिषयमा लेखेको कुरालाई ‘वनमारा झार’ भनेपछि जिल्लाका शिर्षस्थ नेता देखि समकालिन नेता आक्रोशित बनेका थिए । दिनभर जिल्लाको राजनीति गरम र तरंगित बन्यो । खैरहनी ,नारायणघाट र पश्चिम चितवनको जगतपुरमा भएका छुट्टाछुट्टै कार्यक्रममा खनालको अरू प्रतिस्पर्धी नेतासंग सवाल जवाफ ,एक अर्कामा टिप्पणी र कटाक्ष गरेका थिए ।
जिल्लाका अग्रज एवं समकालीन नेताहरु उनको विरुद्ध खरो रुपमा उत्रेका छन् । पार्टीको जिल्ला कार्यसमिति निर्वाचनमा निकटतम प्रतिस्पर्धी रहेका मिलनबाबु श्रेष्ठले गलत मान्छेको हातमा संगठन परेकोले कांग्रेस पार्टी कमजोर भएको भन्दै आक्रोश पोखे । उनी यतिमा मात्र रोकिएनन । खनालकै कारण स्थानीय निर्वाचनमा पनि पार्टीले क्षति बेहोर्नु परेको आरोप लगाए । खनाललाई खोइरो खन्ने श्रेष्ठ मात्र थिएनन ।
अन्य नेताहरुपनि खनालको अभिव्यक्ति प्रति रुष्ट भए । कांग्रेस नेता उत्तम जोशीले आलोचना खेप्न नसक्ने सच्चा नेता हुन नसक्ने भन्दै कडा टिप्पणी गरे । ‘आफ्ना प्रतिस्पर्धीको बिरोधलाई सहन नसक्ने नेता हुदैनन् केन्द्रले प्रतिनिधि खटाएर चितवनको समस्या समाधान गरियोस् ।’ जोशीले आक्रोश पोखे ।
यस बिषयमा प्रतिक्रया दिदै डाक्टर सूर्यकान्त घिमिरेले भने ‘आन्तरिक कलहले पार्टी कमजोर हुन्छ कलहमा बस्नु हितकर छैन । नेतृत्वले सबै भातृसंस्था विस्तार गरेर संगठन बलियो बनाउनुपर्छ यो केन्द्र देखि जिल्ला तहको दाहित्व हो र सबैजनालाई नेतृत्वले समन्वय पनि गर्नुपर्छ ।’
संगठनमा अन्तरघात र बिद्रोह फरक कुरा भएकोले बिद्रोहलाई समाधान गरेर मात्र संगठन बलियो हुने घिमिरेको तर्क छ । केन्द्रिय प्रतिनिधि श्याम घिमिरेले जिल्लामा पार्टीबीच भित्रभित्रै फुट र गुटका कारण पार्टी कमजोर भएकोले जिल्लामा राजनीति समन्वय अनिवार्य हुनुपर्ने भन्दै सुझाए । ‘उपविजेतालाई पनि समेट्ने काम भयो भने कांग्रेस बलियो हुन्छ ।’ घिमिरेले भने ।
जिल्लाको पार्टी संगठनलाई टाढै रहेर नजिकबाट बुझ्ने नेता सभापतिका प्रत्यासी एबं बागमती प्रदेशका सदस्य कैलाश कोइराला पनि खनालको व्यवहार र अभिव्यक्तिप्रति असन्तुष्टी छन । नवीनखबरलाई टेलिफोन सम्पर्कमा प्रतिक्रिया दिदै कोइराला भने ,‘ यो सबै खेलोले पार्टी ध्वस्त पार्ने षडयन्त्र हुंदैछ। विस्तारै सबैले बुझ्छन ।’
कांग्रेसका सबै कार्यकर्तामा यस्ता घटनाले उत्साह भन्दा निराशा बढाएको स्वंय नेता तथा कार्यकर्ता बताउंँछन ।
