काठमाडौं १७ भदौ
प्रतिनिधिसभाको महाभियोग सिफारिस समितिले सोधेका प्रश्नलाई निलम्बित प्रधानन्यायाधीश चोलेन्द्रशमशेर जबराले ‘अर्थ न बर्थ गोविन्द गाई’को संज्ञा दिएका छन्।
उनले आफूले संविधान र कानुनविरुद्ध गरेको भनिएका कामको विषयमा एकएक जवाफ समितिसँग मागेका छन्। समितिको बैठकमा दोस्रो दिन बिहीबार पनि बयान दिन उपस्थित जबरालाई ५ र ६ नम्बरका प्रश्न सोधिएको थियो। उनले बुधबार १ देखि ४ नम्बरसम्मका प्रश्नको जबाफ दिएका थिए।
प्रश्न नम्बर ५ को उत्तर दिँदा जबराले ‘अर्थ न बर्थ’ भन्दै आफूमाथि लगाइएका आरोप निराधार भएका टिप्पणी गरे। संवैधानिक जिम्मेवारीलाई निजी सम्पत्तिसरह दुरुपयोग गरेको भनी सोेधिएको प्रश्नमा उनले यस्तो प्रतिक्रिया दिएका हुन्। उनले भने, ‘यो प्रश्न अलि भेग छ, यो कुरा बुझ्ने अवस्था छैन। कोभिडसम्बन्धी रिट दर्ता गर्ने व्यवस्था गराएकाले यो भन्न खोजिएको हो ? सोही अनुरूपको कर्तव्य पालना गर्न पूर्ण विफल भएको भन्न खोजिएको हो ?’
न्यायपालिका प्रमुखको हैसियतमा तपाईंसँग कुनै पनि गुण र अपेक्षा नरहेकाले अब पदमा राखिरहन मिल्दैन भन्ने आरोपसम्बन्धी प्रश्नको उत्तरमा राणाले भने, ‘संविधानले नै नेतृत्व प्रधानन्यायाधीशलाई दिएको छ ।
अन्तिम निकाय भनेको न्यायपालिका नै हो, यसमा दुईमत राख्नुपर्ने कुनै कुरा छैन।’ उनले प्रधानन्यायाधीशले अधिकार दुरुपयोग गरेको भन्ने आरोप औचित्यहीन भन्दै समिति सदस्यलाई भने, ‘तपाईंले उठाएको प्रश्नको कुरा केबाट देखिने हो, पुष्टि गर्ने आधार के हो, म कसरी खण्डन गरूँ ?
जबराले महाभियोग सिफारिस समितिको निष्पक्षतामा प्रश्न उठाउँदै पाँचजना त महाभियोग प्रस्ताव दर्ता गराउनेमध्येकै भएको बताए। उनले भने, ‘हाम्रो न्यायालयमा जसले आरोप लगाउँछ, उही न्यायाधीश हुँदैन, योभन्दा बढी मैले भन्दिनँ, हामीले जे गरे पनि निष्पक्ष ढंगले गर्छौं भनेर समिति सदस्यले भन्नुभएको छ। तर छानबिन समितिका पाँचजनाले त ममाथि अभियोग लगाउनुभएको छ। यो अभियोगको औचित्य छैन। न यो महाभियोगको प्रक्रिया कानुनी दृष्टिले वैध हुन्छ।’ उनले अगाडि भने, ‘तपाईंहरू आफैं मलाई स्पष्ट गरिदिनुस् कि संविधान र स्वतन्त्र न्यायपालिकाले भनेका कुनकुन काम मैले पूरा गरिनँ। महाभियोग पूर्वाग्रही छ।’
जबराले आफूले गत कात्तिक १५ गतेका लागि ललितानिवासको जग्गा हिनामिनासम्बन्धी मुद्दाको पेसी तोकेपछि ७ गतेदेखि नै अदालतमा आन्दोलन सुरु गरिएको बताए। उनले आफूले गरेका काम पदीय मर्यादा, आचरण र संविधानविपरीत भए त्यसलाई सैद्धान्तिक आधारले पुष्टि गर्ने कि तथ्यगत आधारले भन्दै प्रश्न गरे। नागरिक दैनिकबाट
