कालीकोट, २४ असोज ।
तिलागुफा नगरपालिका–४ राँचुली गाउँमा मलाम गएका १३ जना सम्पर्कविहीन भएका छन् । शनिबार मृत्यु भएका स्थानीय युवक हेमराज शाहीको मलाममा तिला नदी गएका वडाध्यक्ष परबहादुर शाही, विद्यालय व्यवस्थापन समितिका अध्यक्ष छत्रबहादुर शाहीसहित १३ जना मलामी सम्पर्कमा नआएको तिलागुफा नगरपालिकाका उपप्रमुख महेन्द्रबहादुर शाहीले बताए । उनका अनुसार १५ जनामध्ये दुई जना सम्पर्कमा आएका छन् भने १३ जना अझै सम्पर्कविहीन छन् ।
राँचुलीमा मलाम गएका सम्पर्कविहीन भएको खबर पाएपछि खोजीका लागि प्रहरी टोली पठाएको प्रमुख जिल्ला अधिकारी रामहरि शर्माले जानकारी दिए । तिला नदी किनारमा लास जलाउँदै गरेको अवस्थामा पहिरो झरेपछि मलामी गएकाहरुको भागाभाग भएको थियो । मलामीमध्ये १३ जना हराएको पुष्टि भएको प्रमुख जिल्ला अधिकारी रामहरि शर्माले जानकारी दिए ।
मृतकका बाबु पनि बेपत्ता
कालिकोट तिलागुफा नगरपालिका–४ का १८ वर्षीय हेमराज शाही मुटु रोगी थिए । उनको त्रिवि शिक्षण अस्पतालमा शल्यक्रिया गर्ने मिति तय थियो । दसैँ नजिकिँदै थियो । परिवारका सदस्यले दसैँ मनाएर शल्यक्रिया गर्ने योजना बनाए । तर, हेमराजले शनिबार प्राण त्यागे ।
पछिल्लो पाँच दिनयता कालिकोटलगायत जिल्लामा लगातार वर्षा भइरहेको छ । शनिबार बिहान हेमराजको शव अन्त्योष्टि गर्न बुबासहित ६० बढी मलामी घरबाट निस्किए ।
तिलागुफा–४ राचुलीमा नदी किनारमा शवमा दागबत्ती दिइयो । दागबत्ती दिनेमा थिए, हेमराजकै ६० वर्षीय बुबा कालीबहादुर शाही ।
घटनास्थलमा रहेका तिलागुफा नगरपालिकाका उपमेयर महेन्द्रबहादुर शाहीले भने, “चिता जल्दाजल्दै माथिबाट पहिरो खसेछ । भागदौड भयो । चिता नजिकै रहेका उनका बुवा ४ नम्बर वडाका अध्यक्ष प्रसिद्ध शाहीसहित १३ जनालाई पहिरोले पुरेछ । कोही भेटिएका छैनन् ।”
चार घण्टा पैदल हिँडेर प्रहरी टोली सोमबार घटनास्थल पुगेको छ । बेपत्ता भएकाहरुको खोजी कार्य जारी छ । बेपत्ता हुनेहरुमा हेमराजका बुबा कालीबहादुर शाही, वडाध्यक्ष प्रसिद्ध शाही, प्रशान्त शाही, मोतिलाल शाही, नरेश शाही, छत्र शाही, धनबहादुर शाही, अनिल शाही, मानबहादुर शाही, खगेन्द्र शाहीलगायत छन् ।
