चितवन, २ कात्तिक ।
गत साउन २० गतेसम्म नेपालमा दर्ता भएका ११६ वटा दलमध्ये एक दल हो, राष्ट्रिय स्वतन्त्र पार्टी (रास्वपा) । पार्टी दर्ता नम्बर १८७ रहेको रास्वपा दर्ता भएकामध्ये ११३औँ दल हो । यसका सभापति हुन् चर्चित सञ्चारकर्मी रवि लामिछाने । चितवन क्षेत्र नम्बर २ बाट प्रतिनिधिसभा सदस्य पदमा उम्मेदवारी दिएका लामिछानेले चुनावपछि आफ्नो पार्टीको सरकार बनाउने सपना देखेका छन् ।
लामिछानेको यो सपना दिवास्वप्न हो । दिउँसै देखिने सपनालाई दिवास्वप्न भनिन्छ, जुन कहिल्यै पूरा हुँदैन । त्यसो त रातमा देखिने सपना पनि पूरा हुँदैनन् । दिउँसो होस् वा राति, सपना देख्न पाइन्छ । तर यस्तो कहिल्यै पूरा नहुने सपना देखाएर मतदातालाई झुक्याउन पाइँदैन । रास्वपाले चुनावपछि सरकार बनाउने आधार के हो ? केही पनि छैन ।
२७५ सदस्यीय प्रतिनिधिसभामा १६५ जना सदस्य प्रत्यक्ष र ११० जना समानुपातिक मतबाट निर्वाचित हुन्छन् । रास्वपाले प्रत्यक्षतर्फको १६५ क्षेत्रमध्ये १३१ क्षेत्रमा मात्रै उम्मेदवारी दिएको छ । प्रत्यक्षतर्फ ३४ क्षेत्रमा उम्मेदवारी नै दिन नसकेको रास्वपाले चुनावपछि सरकार बनाउँछु भनेर नारा फलाक्दै हिँड्नु आकासको तारा झारिदिन्छु भने बराबर छ । ११० समानुपातिक सिटबाट कति सिट पाउला रास्वपाले ? प्रत्यक्ष चुनाव जितेर कति सिट ल्याउला ? अनि सरकार बनाउन चाहिने कम्तीमा १३८ सिट आउँछ रास्वपाको ? आउँदैन । फ्यानहरुको दुईचार दिनको हाइहाइले चुनाव जितिँदैन । रास्वपाले सरकार बनाउने कुरा एकछिनको लागि परै राखौँ । स्वयं लामिछानेले चितवनमा चुनाव जित्ने आधार समेत छैन ।
क्षेत्र नम्बर २ मा उमेश श्रेष्ठ अगाडि
चितवन क्षेत्र नम्बर २ बाट प्रतिनिधिसभा सदस्यमा सत्तारुढ गठबन्धनको साझा उम्मेदवारका रूपमा नेपाली कांग्रेसका केन्द्रीय सदस्य एवं राज्यमन्त्री उमेश श्रेष्ठ उम्मेदवार छन् । भरतपुर महानगरपालिका ५, कल्याणपुरका स्थायी बासिन्दा श्रेष्ठ विकासप्रेमी नेताका रुपमा परिचित छन् । स्थानीय निर्वाचनमा भरतपुरको मेयरमा रेनु दाहाललाई निर्वाचित गराउन विशेष भूमिका खेलेका श्रेष्ठ गठबन्धनबाट सबैभन्दा बलियो उम्मेदवारका रुपमा देखा परेका छन् ।
शिक्षा, स्वास्थ्य, ऊर्जा र पर्यटन क्षेत्रमा ठूलो लगानी गरेका श्रेष्ठले अबका दिनमा राजनीति र समाजसेवामार्फत् आफूलाई जनतामा समर्पित गर्ने पवित्र भावनाले आफू चितवन २ बाट प्रतिनिधिसभा सदस्य पदमा प्रत्यासी रहेको बताए । उनले आफूलाई चितवन क्षेत्र नम्बर २ का जनताले अत्याधिक बहुमतले विजयी गराउनेमा आफू ढुक्क रहेको सुनाए । कांग्रेस नेता श्रेष्ठले आफू प्रतिनिधिसभा सदस्यमा निर्वाचित भएपछि आफूले पाउने तलब र भत्ता नलिने घोषणा गरिसकेका छन् ।
श्रेष्ठविरुद्ध नेकपा एमालेबाट नेता कृष्णभक्त पोखरेल र राष्ट्रिय स्वतन्त्र पार्टीका सभापति रवि लामिछानेले पनि उम्मेदवारी दर्ता गराएका छन् । पोखरेल विगतमा यसै क्षेत्रबाट निर्वाचित भए पनि यसपटक एमाले टुक्रिएको र माओवादी केन्द्रको साथ कांग्रेसलाई रहेकोले अन्तिम नतिजा उनको पक्षमा पर्ने देखिँदैन । स्वतन्त्र पार्टीका लामिछाने रैथाने नभएको र उनले पहिले चितवन ३ बाट उम्मेदवारी दिने चर्चा चलेकोमा अन्तिम समयमा आएर चितवन २ बाट उम्मेदवारी दर्ता गराएको कारण उनकै पार्टीका मतदाता उनीसँग चिढिएका छन् । यसले कांग्रेसका श्रेष्ठलाई जित्न सघाउने आँकलन गरिएको छ ।
चितवन २ मा भरतपुर महानगरपालिकाभित्रका १० वटा वडा, कालिका नगरपालिका र इच्छाकामना गाउँपालिका पर्छन् । यो भुगोल र यहाँका मतदाताबारे रास्वपाका सभापति रवि लामिछाने आधा पनि जानकार छैनन् । टेलिभिजनमा कार्यक्रम चलाएर सेलिब्रेटी बनेका लामिछानेको नामै नसुनेका मतदाता यस क्षेत्रको पहाडी भूभागमा प्रशस्त छन् । आफैँले जित्ने टुंगो नभएका लामिछानेले सरकार बनाउने सपना देखेका छन् । सपना देख्न पाइन्छ ।
