दक्षिण अफ्रिका
दक्षिण अफ्रिकाका पाइलट रुडोल्फ इरास्मसले प्लेन ११ हजार फटको उचाइमा उडाइरहेका थिए। सोही समयमा उनलाई प्लेनमा गोबन सर्प भएको थाहा भयो।उनी बसेको सिटमुनि गोबन सर्प भएको थाहा पाउँदाको समयको बारेमा बोल्दै उनले भने, ‘इमानदारीपूर्वक भन्नुपर्दा, मेरो दिमागले के भइरहेको थियो बुझ्न सकेन। यो डरलाग्दो क्षण थियो।’
पायलट रुडोल्फले ढाडमा चिसो चीजको स्पर्श महसुस गरे। सुरुमा उनाई आफ्नो पानीको बोतल हो जस्तो लागेको थियो। उनले भने, ‘मलाई चिसो अनुभव भयो। केहि घस्रिरहेको जस्तो लाग्यो।’
रुडोल्फले आफ्नो पानीको बोतल राम्रोसँग बन्द नभएकोले पानी सर्टमा बगेको होला भन्ने सोचे। उनले भने, ‘जब मैले बायाँतिर फर्केर तल हेरेँ, त्यहाँ एउटा गोबन सर्प थियो। उसले सिट भित्र टाउको घुसार्न खोजिरहेको थियो।’
रुडोल्फ ब्लोमफन्टेनबाट प्रिटोरिया जाँदै थिए। उक्त विमानमा थप चार जना यात्रु थिए। विमानमा सर्प भएको थाहा पाएपछि उनले आकस्मिक अवतरण गरे।
पाइलट रुडोल्फ इरास्मसले सर्पले टोके ३० मिनेटमा मृत्यु हुनसक्ने भएकोले उनले विमानमा आतंक मच्चाउन नचाहेको बताए।
रुडोल्फले आफूले पहिले शान्त भएर सोचेको र त्यसपछि विमानमा सर्प भएको कुरा यात्रुलाई बताएको जनाए। सर्प पछाडी गएर बाँकी मानिसमा त्रास फैलिन सक्छ भन्ने उनलाई डर थियो।
अन्तमा, उनले यात्रुहरूलाई यसको बारेमा जानकारी दिने निर्णय गरे। उनले यात्रुहरूलाई भने, ‘सुन्नुहोस्, विमान भित्र एउटा सर्प छ, त्यो मेरो सिटमुनि छ। त्यसैले जतिसक्दो चाँडो विमान अवतरण गर्ने प्रयास गर्दै छु।’
यदि उनी आत्तिएको भए अवस्था अझ खराब हुन सक्ने उनले बताए। उनले वेलकम सिटीमा विमानको आकस्मिक अवतरण गराए। विमानमा काम गर्ने दुई जनाले विमान मुनि सर्प देखेको पहिलै बताएका थिए। तर आफूहरु ‘पक्रन’ असफल भएको बताएका थिए।
पाइलट रुडोल्फले विमानमा चढ्नुअघि सर्प खोज्ने प्रयास गरेको बताए। उनले भने, ‘दुर्भाग्यवश फेला परेन। त्यसपछि हामी सबैले भागेछ भन्ने अनुमान गर्यौँ।’
विमान अवतरणपछि पनि सर्प भेटिएको छैन। विमानको जाँच गर्ने इन्जिनियरहरूले सर्प फेला पार्न सकेनन्। दक्षिण अफ्रिकाको नागरिक उड्डयन विभागका आयुक्त पोप्पी खोसाले पाइलट रुडोल्फको प्रशंसा गरे।
खोसाले भने, ‘उनले अद्भुत काम गरे र विमानमा सवार सबैको ज्यान बचाए।’ तर पायलट रुडोल्फले आफूले गरेको काम खास नभएको बताउँछन्।
उनले भने, ‘म शान्त रहेका मेरा यात्रुहरूको पनि प्रशंसा गर्दछु।’ बीबीसी
