भोजपुर २९ मङ्सिर
होम्ताङ पिखुवा लिफ्ट खानेपानी आयोजना अन्तिम चरणमा पुगेको छ । भोजपुरको हतुवागढी गाउँपालिकामा अनुमानित कूल रु ३० करोड ९० लाख ८२ हजार लागतमा आयोजनाको काम थालनी गरिएको हो । पानीको समस्यामा रहेका हतुवागढीको वडा नं १, ५ र ६ का करिव एक हजार चार सय ६९ घर परिवारलाई पिउने पानी पु¥याउने लक्ष्यका साथ काम भइरहेको छ ।
खानेपानी तथा सरसफाइ डिभिजन कार्यालय भोजपुर अन्तर्गत निर्माण भइरहेको यो आयोजनाको मुख्य पाइपलाइन विस्तार, ट्याङ्की, पालेघर, शौचालय निर्माण लगायतको काम अन्तिम चरणमा पुगेको निर्माण उपभोक्ता समितिले जनाएको छ । हालसम्म करिव चार हजार दुई मिटर मुख्य पाइपलाइन मध्ये दुई हजार चार सय ६० मिटर विस्तार सम्पन्न भएको छ ।
त्यस्तै आयोजनाको लागि पालेघर, शौचालय, ३० घन मिटर(को ट्याङकी ,४० घन मिटरको ट्याङकी , ७५ घन मिटरको ट्याङकी र मुहानमा पानी तान्न सम्फवेल(इनार) निर्माण सकिएको उपभोक्ता समितिका सचिव राजेन्द्र राईले जानकारी दिनुभयो ।
आयोजनाको लागि शाखा पाइप लाइन, शाखा लाइन ट्याङ्की निर्माण र बराङ डाँडाँबाट जैसी धारासम्म मुख्य लाइन विस्तार गर्न बाँकी रहेको उहाँको भनाइ छ । प्रदेश सरकारबाट बर्सेनी आउने बजेट कम हुँदा काममा केहि ढिलाई भएको सचिव राईले बताउनुभयो । “आयोजना निर्माणका काम तीव्र गतिमा अघि बढाएका छौँ”सचिव राईले भन्नुभयो,“बस्तीमा चाडो पानी पु¥याउने लक्ष्यका साथ काम गरिरहेका छौँ । वर्सेनी थोरै थोरै मात्र बजेट आउने गरेकोले काममा केहि ढिलाई हुने अवस्था बनेको छ ।”
हालसम्म भौतिक संरचनाको करिव ७० प्रतिशत काम सम्पन्न भएको उपभोक्ता समितिका अध्यक्ष विजय राईले बताउनुभयो । विद्युत् विस्तारपछि पानी वितरणको काम थालनी गरिने उहाँको भनाइ छ । वर्सेनी थोरै बजेट विनियोजन हुँदा काममा केहि ढिलाई भएको अवस्था रहेको अध्यक्ष राईको भनाइ छ ।“योजनालाई चाडो सम्पन्न गराउने उद्धेश्यका काम गरिरहेका छौँ” उहाँले भन्नुभयो,“विद्युत् विस्तारको काम शुरु गर्ने तयारी भईरहेको छ । विद्युत् विस्तार सम्पन्न भएपछि पानी वितरण गछौँ ।”
योजनाको कामको भौतिक निर्माण अन्तिम चरणमा पुगेकोले अब पानी वितरणको काम अघि बढाउने खानेपानी तथा सरसफाई डिभिजन कार्यालय भोजपुरले जनाएको छ । पानी तान्नको लागि पम्प जडानको लागि विद्युत् विस्तारको सर्वे भईरहेको खानेपानी तथा सरसफाई डिभिजन कार्यालय प्रमुख देवनाथ सिंहले बताउनुभयो । विद्युत् जडान पश्चात सवै पाइपलाइन तथा ट्याङ्कीको परीक्षण गरेर पानी वितरणको काम गरिने उहाँको भनाइ छ ।“लामो समयबाट यहाँको भौतिक निर्माणको काम भइरहेको छ” प्रमुख सिंहले भन्नुभयो,“यो काम अन्तिम चरण पुगेको अवस्था छ । अव हामी यहाँ विद्युत् जडान गरेर पानी तान्ने कामलाई अघि बढाउछौँ ।”
यस वर्ष आएको करिव रु. एक करोड ५० लाख बजेटबाट आयोजनाको लागि विद्युत् जडान गरिने प्रमुख सिंहको भनाइ छ । थप कामलाई तीव्र गतिमा अघि बढाएर स्थानीयलाई चाडो पानी खुवाउनको लागि सवै संरचनाको कार्यालयले स्थलगत अनुगमन गरेको छ । प्राविधिकहरुसहितको समुहले अनुगमन गर्दा मुहानमा निर्माण भएको ट्याङ्कीमा खोलाले धार परिवर्तन गरेकोले कम पानी देखिएकाले त्यसको सुधार गर्नु पर्ने देखिएको प्रमुख सिंहले जानकारी दिनुभयो ।
“उपभोक्ता समितिद्धारा यहाँ निर्माण भएका सवै संरचनाहरुको विस्तृत रुपमा अनुगमन गरेका छौँ” उहाँले भन्नुभयो,“ अनुगमनका क्रममा देखिएका प्राविधिक समस्यालाई समाधानको पहल गछौँ ।” प्रदेशबाट आवश्यक बजेट आएको खण्डमा आगामी वर्ष भित्र योजनालाई पूर्णता दिने लक्ष्य रहेको कार्यालयको भनाइ छ । कम बजेट विनियोजन हुँदा कामलाई सम्पन्न गराउन चुनौति रहेको कार्यालयले जनाएको छ ।
यो आयोजना सम्पन्न भएपश्चात गाउँपालिकाका धेरै स्थानीयको पानीको समस्या अन्त्य हुने गाउँपालिका अध्यक्ष प्रेमकुमार राईले बताउनुभयो । विगतका वर्षहरुमा कम बजेट विनियोजन हुँदा काममा ढिलाई हुने अवस्था देखिएको उहाँको भनाइ छ । योजनालाई चाडो सम्पन्न गराउन स्थानीय सरकारले पनि आवश्यक भूमिका खेलिरहेको अध्यक्ष राईले बताउनुभयो । “यो हाम्रो गाउँपालिकाको निकै ठुलो खानेपानी योजना हो” अध्यक्ष राईले भन्नुभयो,“यसले तीन वटा वडालाई समेटेको छ । यहाँका पानीको समस्या रहेका स्थानीयलाई प्रत्यक्ष राहत पुग्ने छ । निर्माण कामलाई चाडो सम्पन्न गराउन हामीले पनि आवश्यक भूमिका खेलिरहेका छौँ ।”
प्रदेश सरकारबाट प्रयाप्त बजेट नआउँदा काममा केहि ढिलाई भएको अवस्था रहेको उहाँको भनाइ छ । करिव पाँच वर्षअघिबाट शुरु भएको योजना रहेकाले यसलाई चाडो सम्पन्न गराउन सरकारले प्राथमिकताका साथ बजेट विनियोजन गर्नु पर्ने अध्यक्ष राईले बताउनुभयो ।
योजनाबाट पानीको समस्यामा रहेका स्थानीयलाई प्रत्यक्ष लाभ पुग्ने हतुवागढी ६ का अध्यक्ष मोहनकुमार राईले बताउनुभयो । “हाम्रो वडामा पानीको निकै समस्या छ” वडाध्यक्ष राईले भन्नुभयो,“स्थानीयबासी पानीको पर्खाइमा छन् । पानी बस्तीमा आएपश्चात वर्षौबाट रहँदै समस्या अन्त्य हुनेछ । आयोजना समयमा सम्पन्न वडाले आवश्यक पहल गर्दै आएका छौँ ।”
स्थानीयको बहुप्रतिक्षित योजना रहेकोले कामलाई चाडो सम्पन्न गराउन राज्य गम्भिर बन्नु पर्ने हतुवागढी ५ का वडाध्यक्ष सुरेसकुमार राईले बताउनुभयो । योजना सम्पन्न भएपश्चात यसको दिगोव्यवस्थापनको लागि वडाले पनि पहल गर्ने उहाँको भनाइ छ ।
स्थानीबासीको पानीको समस्या समाधानको लागि पिखुवा खोलाबाट सात लिफ्ट गरेर पानीलाई बस्तीमा ल्याउन आर्थिक वर्ष २०७५÷०७६ बाट आयोजना निर्माण थालिएको हो
