न्युयोर्क । अपदस्थ भेनेजुएलाका नेता निकोलस मादुरो र उनकी पत्नी सिलिया फ्लोरेस सोमबार म्यानहट्टनको संघीय अदालतमा पहिलो पटक उपस्थित भएका छन्। उनीहरूलाई अमेरिकाले काराकसमा गरेको सैन्य अपरेशन मार्फत पक्राउ गरेको थियो।
मादुरोले अदालतमा आफूमाथि लगाइएका सबै आरोप अस्वीकार गरेका छन्। अदालतमा उनले भने, “म निर्दोष छु। म अपराधी होइन। म राम्रो व्यक्ति हुँ र आफ्नो देशको राष्ट्रपति हुँ।” उनले भनेका छन्र अदालतले यस मुद्दाको अर्को सुनुवाइ मार्च १७ मा तोकेको छ।
मादुरो र फ्लोरेस एमडीसी-ब्रुकलिनमा संघीय हिरासतमा राखिएका छन्। उनीहरूले अधिवक्ता न्यायाधीश एल्भिन हेलेरस्टिनको अगाडि दिउँसो १२ बजे उपस्थित भइ कानूनी प्रक्रिया शुरू गरे। अदालतमा प्रवेश गर्दा मादुरोले दर्शकलाई “बुएनोस डियस” भनेर अभिवादन गरे। उनी हथकडी र नारंगी जेल चप्पलमा अदालतमा उपस्थित थिए र पत्नीको छेउमा दुई सिटको दूरीमा बसे। दम्पतीले अदालतद्वारा उपलब्ध गराइएको अनुवादक सुन्न हेडफोन प्रयोग गरेका थिए।
अदालतमा मादुरोले अनुवादकमार्फत घोषणा गरे, “म भेनेजुएलाको राष्ट्रपति हुँ। म काराकस, भेनेजुएलामा मेरो घरमा पक्राउ परेको थिएँ।” त्यसपछि न्यायाधीशले भने कि उनको हिरासत सम्बन्धी चुनौतीको समय पछि हुनेछ।
यो घटनाले अन्तर्राष्ट्रिय स्तरमा ठूलो ध्यान खिचेको छ र भेनेजुएलामा राजनीतिक अस्थिरता बढाएको छ। अमेरिकी अधिकारीहरूले यस अपरेशनपछि देशको राजनीतिक नियन्त्रण र तेल उद्योगको नियन्त्रणमा पहल गर्ने बताएका छन्।
न्यूयोर्कको दक्षिणी जिल्लामा मादुरो, उनको परिवार र मन्त्रिपरिषद् सदस्यहरूमाथि दायर गरिएको अभियोगमा मादुरोलाई लागूपदार्थ–आतङ्कवादमा संलग्नता र कोकेन आयात गर्ने षड्यन्त्रको आरोप लगाइएको छ ।
