सिन्धुली । सिन्धुलीको घ्याङ्लेख गाउँपालिकास्थित एसबीआई बैंकमा हिजो साँझ लुटपाट भएको छ। घ्याङ्लेख गाउँपालिका–२ बस्तीपुरस्थित नेपाल एसबीआई बैंकको हायुटार शाखामा मंगलबार राति सशस्त्र लुटपाट भएको हो। नकाबधारी पाँच/छ जनाको समूहले बैंकमा प्रवेश गरी ठूलो रकम लुटपाट गरेका थिए।
प्रहरीका अनुसार साँझ करिब ८:४० बजे लुटेराहरूले सुरक्षा गार्ड रुद्रबहादुर कार्कीलाई नियन्त्रणमा लिएर खुकुरी प्रहार गर्दा उनी घाइते भएका छन्। त्यसपछि बैंकका कर्मचारीलाई नियन्त्रणमा लिएर ३ करोड १० लाख ९५ हजार २८३ रुपैयाँ लुटेर समूह फरार भएको थियो।
भाग्ने क्रममा स्थानीयको होहल्लापछि लुटेराहरूले केही रकम बोकेको बोरा घटनास्थलमै छाडेका थिए। त्यसपछि गरिएको खोजतलासमा घटनास्थल वरपर २–३ किलोमिटर क्षेत्रबाट रकम फेला परेको प्रहरीले जनाएको छ। हालसम्म १ करोड ८० लाख १० हजार ५०० रुपैयाँ बरामद गरिएको जिल्ला प्रहरी कार्यालय सिन्धुलीले जानकारी दिएको छ। लुटपाटमा प्रयोग भएको बा.डी.०३९८ नम्बरको टाटा सुमो जीपसहित चालक भवत सिंह थापालाई प्रहरीले नियन्त्रणमा लिएको छ। प्रारम्भिक अनुसन्धानमा ‘केटी भगाउने’ बहानामा भाडामा सुमो रिजर्भ गरिएको खुलेको छ।
यसैगरी, घटनामा संलग्न चार जनालाई घ्याङ्लेख गाउँपालिका–१ सुकाचुरी क्षेत्रबाट स्थानीयको सहयोगमा पक्राउ गरिएको छ। फरार रहेका अन्य व्यक्तिको खोजी तथा घटनासम्बन्धी थप अनुसन्धान जारी रहेको प्रहरीले जनाएको छ। यो घटनाले ग्रामीण क्षेत्रमा बैंक सुरक्षालाई थप मजबुत बनाउनुपर्ने आवश्यकता औंल्याएको छ।
