काठमाडौं । त्रिभुवन अन्तर्राष्ट्रिय विमानस्थल भन्सार कार्यालय अन्तर्गतको वैदेशिक हुलाक भन्सार शाखा, डिल्लीबजारमा कार्यरत भन्सार अधिकृतसहित तीन कर्मचारी घुससहित रंगेहात पक्राउ परेका छन् ।
त्रिभुवन अन्तर्राष्ट्रिय विमानस्थलको भन्सारको वैदेशिक हुलाक शाखामा कार्यरत भन्सार अधिकृत इन्द्र न्यौपाने, कार्यालय सहयोगी गणेशप्रसाद पुडासैनी, र हुलाक भन्सार पार्सल शाखाका नायब सुब्बा छविप्रसाद रिजाललाई अख्तियार दुरुपयोग अनुसन्धान आयोगको टोलीले गोष्वारा हुलाक कार्यालय, डिल्लीबजारबाट पक्राउ गरेको हो।
पुडासैनीको साथबाट घुसबापत लिएको नेपाली रूपैयाँ १० हजार र विदेशी मुद्रा सहित १ लाख ४६ हजार ४२० रुपैयाँ बरामद भएको छ। रिजालको साथबाट २० हजार रुपैयाँ र स्रोत नखुलेको रकमसहित कुल २ लाख ६८ हजार २८८ रुपैयाँ फेला परेको अख्तियारले जनाएको छ। उनीहरूलाई कुरियर कम्पनीमार्फत विदेश पठाइने सामानको भन्सार प्रक्रिया सहज गरिदिने भन्दै घुस लिएको आरोप छ। अख्तियारले गोप्य उजुरीको आधारमा छापा मारेको थियो। साथै २३ थान मोबाइल फोन पनि बरामद गरिएको आयोगले जनाएको छ ।
आयोगका अनुसार अर्थ मन्त्रालय, भन्सार विभाग, त्रिभुवन विमानस्थल भन्सार कार्यालयको वैदेशिक हुलाक भन्सार शाखामा कार्यरत भन्सार अधिकृत ईन्द्र न्यौपाने, सोही कार्यालयका कार्यालय सहयोगी गणेश प्रसाद पुडासैनी तथा संचार तथा सूचना प्रविधि मन्त्रालयअन्तर्गत हुलाक सेवा विभागको गोश्वरा हुलाक कार्यालय, पार्सल (निकासी) शाखामा कार्यरत नायब सुब्बा छवि प्रसाद रिजाललाई नियन्त्रणमा लिइएको हो ।
कुरियर कम्पनीमार्फत विदेशमा सामान पठाउने क्रममा सेवाग्राहीसँग घुस/रिसवत माग गरिएको भन्ने सूचना तथा उजुरीका आधारमा अख्तियारको टंगालस्थित कार्यालयबाट खटिएको टोलीले उनीहरूलाई आइतबार डिल्लीबजारस्थित गोश्वरा हुलाक कार्यालयबाट नियन्त्रणमा लिएको हो । हाल उनीहरूमाथि थप अनुसन्धान भइरहेको आयोगले जनाएको छ ।
