काठमाडौं, फागुन ४ । तामाकोसी नदीमा बस खसेर बेपत्ता भएका एक बालकको शव फेला परेको छ।
Advertisement
सिन्धुलीको गोलन्जोर गाउँपालिका–७ तल्लो बजार नजिक सुनकोसी नदी किनारमा सोमबार बिहान बालकको शव भेटिएको जिल्ला प्रहरी कार्यालय सिन्धुलीले जनाएको छ।
फेला परेको शव रामेछापको मन्थली नगरपालिका–२ पिप्ले निवासी हेमलाल तामाङका नौ वर्षीय छोरा कृचन तामाङको रहेको पुष्टि भएको छ। मृतकका ठूलोबुवा युवराज तामाङले शवको पहिचान गरेका हुन्।
गत माघ २७ गते बिहान बा.प्र ००१–०५ ख ९९७५ नम्बरको पूर्व अरनिको यातायात प्रालिको बस मन्थली नगरपालिका–६ बेनीघाट पुलनजिकैबाट तामाकोसी नदीमा खसेको थियो। दुर्घटनामा १३ जनाको मृत्यु भएको थियो भने सात जना घाइते भएका थिए।
उक्त दुर्घटनामा दुई बालक बेपत्ता भएका थिए। तीमध्ये एकको शव फेला परेको हो भने अर्का एक बालक अझै फेला नपरेको प्रहरीले जनाएको छ।
