नवलपरासी, फागुन १३ । नवलपरासी (बर्दघाट–सुस्तापूर्व) को गैँडाकोट नगरपालिका–२ मा एक २४ वर्षीया युवती विभत्स अवस्थामा मृत फेला परेकी छन्।
गुल्मीको मुसिकोट गाउँपालिका–९ घर भई गैँडाकोटमा डेरा गरी बस्दै आएकी बबिता सापकोटा सोमबार साँझ आफ्नै कोठामा मृत भेटिएकी हुन्। युवतीसँग सम्पर्क हुन नसकेपछि उनका दाजुले घरबेटीलाई खबर गरेका थिए। प्रहरी, जनप्रतिनिधि र आफन्तको रोहवरमा ताल्चा फोडेर हेर्दा सापकोटाको शव खाटमा सिरकले छोपिएको अवस्थामा फेला परेको थियो।
जिल्ला प्रहरी कार्यालयका एसपी युवराज खड्काका अनुसार मृतकको शरीरका विभिन्न भागमा धारिलो हतियारको चोट देखिएको छ। टाउको, घाँटी र नाडीमा काटिएको चोटका साथै अनुहारमा निलडाम भेटिएको छ।
घटनाको गम्भीरतालाई ध्यानमा राख्दै प्रदेशस्तरीय अनुसन्धान टोली र तालिमप्राप्त कुकुरसहितको टोली परिचालन गरिएको छ। करिब एक वर्षअघि सम्बन्धविच्छेद भएकी सापकोटा केही समयदेखि एक्लै बस्दै आएकी थिइन्। फागुन १० गते माइतीबाट फर्किएपछि उनी परिवारसँग सम्पर्कमा थिइनन्। प्रहरीले घटनाको विस्तृत अनुसन्धान भइरहेको जनाएको छ।
