काठमाडौं, चैत ४ । गैरआवासीय नेपाली संघ (एनआरएनए) अन्तर्राष्ट्रिय समन्वय परिषद् (आईसीसी) को उपाध्यक्ष पदमा रोजिना प्रधान राई चयन हुनुभएको छ।
संघमा महिला नेतृत्वको सशक्त प्रतिनिधित्व गर्दै उहाँले एक समावेशी, गतिशील र सुदृढ एनआरएनए निर्माणमा नेतृत्वदायी भूमिका खेल्ने विश्वास गरिएको छ। लामो समयदेखि सामाजिक सेवा र प्रवासी नेपाली समुदायका मुद्दाहरूमा सक्रिय रहँदै आउनुभएकी राईको कार्यक्षमता, दूरदृष्टि र संस्थाप्रतिको समर्पणले एनआरएनएलाई नयाँ ऊर्जा र दिशा प्रदान गर्ने अपेक्षा लिइएको छ। उहाँको चयनले विश्वभर रहेका गैरआवासीय नेपालीहरू, विशेषगरी महिलाहरूको आवाजलाई नीतिगत तहमा थप प्रभावकारी रूपमा उठाउन सहयोग पुग्नेछ।
राई केवल एक अभियन्ता मात्र नभई सफल समाजसेवीका रूपमा समेत परिचित हुनुहुन्छ। ‘रोजीहिरा फाउण्डेशन’ की अध्यक्ष रहनुभएकी उहाँले सन् २०१५ को विनाशकारी महाभूकम्प, कोभिड–१९ महामारी तथा देशका विभिन्न भागमा आएका बाढी-पहिरो पीडितहरूका लागि निरन्तर आर्थिक र मानवीय सहयोग उपलब्ध गराउँदै आउनुभएको छ। उहाँको यही सेवाभाव र संघभित्र एकता कायम गर्न निर्वाह गरेको भूमिकाका कारण उहाँ चर्चामा रहनुभएको हो।
एङ्लिया रस्किन युनिभर्सिटीबाट व्यवसाय प्रशासनमा स्नातकोत्तर गर्नुभएकी राईसँग संस्थागत नेतृत्वको लामो अनुभव छ। उहाँ वर्ल्ड नेवा अर्गनाइजेसन, खोटाङ सेवा समाज यूके र एनआरएनए यूकेलगायतका संस्थामा सल्लाहकारको भूमिकामा सक्रिय हुनुहुन्छ। यसका साथै बेलायतमा आयोजित विभिन्न सौन्दर्य तथा प्रतिभा प्रस्फुटन कार्यक्रमहरूमा निर्णायकको भूमिका निर्वाह गर्नुभएकी उहाँलाई नव नारी, टुडेज वुमन, खोटाङ सेवा समाज बेलायतलगायत दर्जनौँ संघ-संस्थाले सम्मान समेत गरिसकेका छन्।
नेपालमा हाइड्रोपावर, हिमालय जाभा, कफी खेती र होटल व्यवसाय जस्ता क्षेत्रमा सफल लगानी गर्नुभएकी राई एक सफल महिला उद्यमी पनि हुनुहुन्छ। उहाँले आफ्नो उम्मेदवारीसँगै विदेशमा आर्जन गरेको ज्ञान, सीप र प्रविधिलाई नेपाल भित्र्याउने, साना तथा ठूला लगानी प्रवर्द्धन गर्ने र ‘एनआरएनए सीप बैंक’ जस्ता कार्यक्रमलाई प्राथमिकता दिने प्रतिबद्धता व्यक्त गर्नुभएको छ।
