वीरगन्ज, वैशाख २९ । सोमबार सार्वजनिक भएको माध्यमिक शिक्षा परीक्षा (एसईई) को नतिजापछि उत्पन्न निराशाका कारण वीरगन्जमा एक किशोरले ज्यान गुमाएका छन्। पर्साको बहुदरमाई नगरपालिका–५ घर भई हाल वीरगन्ज–११ श्रीपुर बस्दै आएका १५ वर्षीय शन्नी पटेलले सोमबार राति आत्महत्या गरेका हुन्।
वीरगन्जको पिपरास्थित नरसिंह माध्यमिक विद्यालयका विद्यार्थी शन्नी नतिजा सार्वजनिक भएदेखि नै तनावमा देखिएका थिए। पारिवारिक स्रोतका अनुसार राति ११:३० बजे परिवारले सम्झाइबुझाई गरिरहेकै समयमा उनी अचानक आफ्नो कोठामा छिरेर ढोका बन्द गरेका थिए। फलामको ढोका भएकाले समयमै खोल्न नसकिएको र पछि ढोका फुटाएर हेर्दा उनले तन्नाको पासो लगाएको अवस्थामा फेला पारिएको थियो।
जिल्ला प्रहरी कार्यालय पर्साले शवको मुचुल्का उठाएर पोस्टमार्टमका लागि नारायणी अस्पताल पठाएको छ। शिक्षाविद् र मनोविदहरूले एउटा परीक्षाको नतिजा नै जीवनको अन्तिम फैसला नभएकाले यस्तो समयमा बालबालिकालाई विशेष मानसिक साथ र सहानुभूति दिन अभिभावकहरूलाई आग्रह गरेका छन्।
