चितवन, जेठ ४ । राप्ती नगरपालिका-१ लोथरबाट नियन्त्रित लागूऔषध ट्रामाडोल १ हजार २ सय ट्याब्लेट र नगद ६२ हजार ३ सय रूपैयाँ सहित मकवानपुर कैलाश गाउँपालिका-४ बस्ने ४२ वर्षीय रामसिंह मोक्तानलाई आइतबार दिउँसो प्रहरीले पक्राउ गरेको छ । इलाका प्रहरी कार्यालय भण्डाराबाट खटिएको प्रहरीले मकवानपुरबाट भण्डारातर्फ आउँदै गरेको बागमती प्रदेश ०३-००२ प ३५९४ नम्बरको मोटरसाइकलमा सवार उनलाई उक्त लागूऔषध सहित पक्राउ गरेको हो ।
रूपन्देही, मायादेवी गाउँपालिका-८ मतकोलवा डेरा गरी बस्ने नवलपरासी पश्चिम घर भएका २६ वर्षीय सुनिल कुमाललाई अवैध लागूऔषध गाँजा करिब ८ किलो ८ सय ४४ ग्राम सहित आइतबार साँझ प्रहरीले पक्राउ गरेको छ । लागूऔषध नियन्त्रण ब्यूरो शाखा कार्यालय भैरहवा र वडा प्रहरी कार्यालय भैरहवाबाट खटिएको प्रहरीले उनको कोठा तलासी गर्दा उक्त गाँजा फेला पारी पक्राउ गरेको हो ।
नवलपरासी पूर्व, गैंडाकोट नगरपालिका-४ कुमालटोलबाट अवैध लागूऔषध गाँजा करिब १ किलो १ सय ३५ ग्राम सहित सोही नगरपालिका-४ इँट्टाभट्टी बस्ने २४ वर्षीय दिपक थापालाई आइतबार राति प्रहरीले पक्राउ गरेको छ । इलाका प्रहरी कार्यालय गैंडाकोटबाट खटिएको प्रहरीले उनलाई उक्त गाँजा सहित पक्राउ गरेको हो ।
यसैगरी रूपन्देही, सिद्धार्थनगर नगरपालिका-१ बाट अवैध लागूऔषध ब्राउनसुगर जस्तो देखिने पदार्थ ३ ग्राम ८१ मिलिग्राम सहित सोही नगरपालिका-१ बेलहिया बस्ने ३२ वर्षीय बैजु प्रसाद कलवारलाई आइतबार राति प्रहरीले पक्राउ गरेको छ । इलाका प्रहरी कार्यालय बेलहियाबाट खटिएको प्रहरीले उनलाई उक्त पदार्थ सहित पक्राउ गरेको हो ।
