काठमाडौं, जेठ ८ । आइसिसी पुरुष विश्वकप क्रिकेट लिग-२ अन्तर्गत त्रिकोणात्मक शृंखलाको अन्तिम खेलमा नेपालले शीर्ष स्थानको अमेरिकामाथि १२२ रनको फराकिलो र रबाफिलो जित दर्ता गरेको छ। त्रिवि क्रिकेट मैदानमा भएको खेलमा नेपालले ब्याटिङ र बलिङ दुवैतर्फ उत्कृष्ट प्रदर्शन गर्दै घरेलु समर्थकलाई उत्साहित बनाएको हो।

टस हारेर पहिले ब्याटिङको निम्तो पाएको नेपालले निर्धारित ५० ओभरमा ८ विकेट गुमाउँदै ३१७ रनको विशाल योगफल तयार पारेको थियो। ३१८ रनको बलियो लक्ष्य पछ्याएको अमेरिका ४१.२ ओभरमा मात्र १९५ रनमा अलआउट हुन पुग्यो।

ईशान र रोहितको उत्कृष्ट साझेदारी, दीपेन्द्रको फिनिसिङ
पहिले ब्याटिङ गरेको नेपालका लागि ओपनर कुशल भुर्तेल र आसिफ शेखले पहिलो विकेटका लागि ६९ रनको साझेदारी गर्दै राम्रो सुरुवात दिलाए। भुर्तेलले २९ रन (३९ बल) र आसिफले ४३ रन (५७ बल) बनाए।

त्यसपछि क्रिजमा आएका ईशान पाण्डे र कप्तान रोहित पौडेलले तेस्रो विकेटका लागि ११० रनको महत्त्वपूर्ण शतकीय साझेदारी गरे। ईशानले ८३ बलमा ८ चौका र १ छक्का प्रहार गर्दै सर्वाधिक ८४ रनको उत्कृष्ट इनिङ्स खेले। कप्तान रोहित भने ४६ रन बनाउँदै एलबीडब्लू  आउट भए। मध्यक्रममा दीपेन्द्र सिंह ऐरीले पनि विष्फोटक ब्याटिङ गर्दै अर्धशतकीय इनिङ्स खेलेपछि नेपाल विशाल योगफलसम्म पुग्न सफल भएको थियो।

सन्दीप र दीपेन्द्रको घातक बलिङ
३१८ रनको लक्ष्य पछ्याएको अमेरिकाको सुरुवात खराब रह्यो। खाता नखोल्दै ओपनर समित पटेल शून्यमै आउट भएपछि संकटमा परेको अमेरिकाका लागि सञ्जय कृष्णमूर्तिले सर्वाधिक ५६ रनको अर्धशतकीय इनिङ्स खेले। त्यस्तै नोस्थुश केन्जिनेले २९, शायन जाहाँगिरले २७, शेहन जयसूर्याले २६ र साइतेजा मुक्कमल्लाले २२ रन जोडे पनि त्यो जितका लागि पर्याप्त भएन।

अमेरिकालाई सस्तैमा समेट्न नेपालका स्पिनर सन्दीप लामिछानेले घातक बलिङ गर्दै ३ विकेट लिए। त्यस्तै दीपेन्द्र सिंह ऐरी, ललित राजवंशी र गुल्सन झाले २–२ विकेट चट्काए भने तीव्र गतिका बलर सोमपाल कामीको नाममा १ विकेट रह्यो।