काठमाडौं । बेल्जियममा आयोजना हुने ईयू टी–२० क्रिकेट लिग खेल्न जाने तयारीमा रहेका नेपालका चर्चित क्रिकेट खेलाडीहरूले नेपाल क्रिकेट संघ (क्यान) बाट ‘नो अब्जेक्सन सर्टिफिकेट’ (एनओसी) नपाएपछि प्रतियोगिता गुमाउने भएका छन्।
एनओसी नपाउने खेलाडीहरूमा आसिफ शेख, रोहित पौडेल, दीपेन्द्रसिंह ऐरी, अनिलकुमार साह, ललित राजवंशी, सन्दीप लामिछाने र लोकेश बम लगायत रहेका छन्। उनीहरू विभिन्न फ्रेन्चाइज टोलीबाट ड्राफ्टमा परेका थिए।
क्यानले भने राष्ट्रिय टोलीको व्यस्त अन्तर्राष्ट्रिय तालिकालाई ध्यानमा राख्दै एनओसी नदिएको जनाएको छ। क्यानका अनुसार नेपालले मे ३१ देखि जुन ९ सम्म सिंगापुरमा हुने एसिया गेम्स छनोट खेल्ने तालिका रहेको छ। साथै नेपाल ‘ए’ टोलीले मे २२ देखि जुन २ सम्म उत्तराखण्डमा हुने ४२औँ अल इन्डिया गोल्ड कपमा सहभागिता जनाउँदैछ।
यसबीच, केवल ईशान पाण्डे र गुल्शन झालाई मात्रै एनओसी प्रदान गरिएको छ। उनीहरू बेल्जियमको जेबी ब्रुजेस टोलीबाट प्रतियोगितामा सहभागी हुनेछन्।
जुन ६ बाट सुरु हुने ईयू टी–२० लिगले यसअघि विभिन्न फ्रेन्चाइजमार्फत नेपाली खेलाडी अनुबन्ध भएको घोषणा गरिसकेको थियो। तर, छनोट तथा प्राविधिक समितिसँगको परामर्शपछि क्यानले अधिकांश खेलाडीलाई प्रतियोगितामा सहभागी हुन रोक लगाएको हो।
