नयाँ दिल्ली, जेठ १८ । भारतीय जनता पार्टी (भाजपा) को निमन्त्रणामा पाँच दिने औपचारिक भ्रमणका लागि सोमबार भारत पुगेका राष्ट्रिय स्वतन्त्र पार्टी (रास्वपा) का सभापति रवि लामिछाने नयाँ दिल्लीस्थित भाजपाको केन्द्रीय मुख्यालय पुगेका छन्।
मुख्यालय परिसरमा उनलाई रातो कार्पेट (रेड कार्पेट) बिछ्याएर, ठाउँ–ठाउँमा स्वागतार्थ होडिङ बोर्डहरू राखेर तथा विशेष बाजागाजा र पुष्पवृष्टिका साथ भव्य स्वागत गरिएको छ। मुख्यालयमा सभापति लामिछानेलाई भाजपाका राष्ट्रिय अध्यक्ष नितिन नवीन लगायतका शीर्ष पदाधिकारीहरूले स्वागत गरेका थिए। रास्वपा प्रवक्ता मनिष झाका अनुसार, यस उच्चस्तरीय भेटवार्तामा दुई देशका राजनीतिक दलबीच संगठनात्मक अनुभव आदान-प्रदान, लोकतान्त्रिक अभ्यास, आपसी राजनीतिक सहकार्यका सम्भावना तथा द्विपक्षीय सम्बन्ध विस्तारका विविध पक्षमा केन्द्रित रहेर गहन छलफल भएको छ।
सभापति लामिछानेको यस भ्रमण टोलीमा उनकी पत्नी निकिता पौडेल, रास्वपा सह-महामन्त्री एवं सांसद बिपिन कुमार आचार्य, सचिवालय सदस्य एवं सांसद दीपक बोहरा र निजी सचिव प्रदीप आचार्य सहभागी छन्। नयाँ दिल्लीस्थित नेपाली दूतावासको समन्वयमा भइरहेको यस भ्रमणका क्रममा लामिछानेले भाजपा मुख्यालयको अवलोकन गर्नुका साथै भारतमा रहेका नेपाली समुदाय तथा पार्टीका शुभेच्छुकहरूसँग विशेष अन्तर्क्रिया गर्ने र आफ्नो भारत बसाइका क्रममा अयोध्याको समेत भ्रमण गर्ने कार्यतालिका रहेको छ।
