काठमाडौँ, असार ९ । नेकपा एमालेका उपाध्यक्ष तथा पूर्वमन्त्री विष्णु पौडेललाई गैरकानुनी रूपमा हिरासतमा राखिएको दाबी गर्दै सर्वोच्च अदालतमा बन्दीप्रत्यक्षीकरण रिट दायर भएको छ। पौडेलकी पत्नीद्वारा दायर गरिएको उक्त रिटमा राजनीतिक प्रतिशोधका आधारमा, बिना कुनै ठोस प्रमाण र आधार पक्राउ गरिएको उल्लेख गर्दै तुरुन्त रिहाइको माग गरिएको छ। सर्वोच्च अदालतले यस रिटमाथि बिहीबारका लागि सुनुवाइको मिति तोकेको छ।
सम्पत्ति शुद्धीकरण अनुसन्धान विभागले दीपक भट्ट र कमल किशोर मालपानी समूहसँगको शेयर लेनदेनको विषयलाई लिएर पौडेलमाथि अनुसन्धान गरिरहेको छ, जसका लागि मंगलबार अदालतबाट ५ दिनको म्याद थप गरिएको थियो। गत सोमबार सुर्खेतमा एक कार्यक्रममा सहभागी भइरहेका बेला उनलाई पक्राउ गरी सार्वजनिक सवारी साधनमा राखेर काठमाडौँ ल्याइएको थियो।
यसैबीच, एमालेले पौडेललाई अपराधीको शैलीमा पक्राउ गरिएको भन्दै सरकारको कदमप्रति कडा आपत्ति जनाएको छ। एमालेको बैठकले यो कदमको विरुद्धमा सदनमा दृढतापूर्वक प्रस्तुत हुने निर्णय गरेको छ। साथै, सोही बैठकले देशमा बढ्दो महँगी नियन्त्रण गर्नुपर्ने मागसहित ७ बुँदे प्रस्ताव समेत पारित गरेको छ।
