काठमाडौं, असार २९ । काठमाडौँका तीन ठूला सञ्चारगृहको गेट थुन्ने गरी शंकास्पद गाडीहरू पार्किङ गरिएको केही समयमै नेपाली कांग्रेसका महामन्त्री गगन थापाको निवासअगाडि पनि त्यसरी नै गाडी बेवारिसे छाडिएको पाइएको छ। काठमाडौँको रातोपुलस्थित थापाको निवासको मूल प्रवेशद्वार नै थुनिने गरी सोमबार बिहान करिब ७ बजेदेखि बा.ए.सी. ९५७५ नम्बरको गाडी पार्क गरेर छाडिएको स्थानीयले बताएका छन्। गाडीलाई यसरी तेर्स्याइएको छ कि त्यहाँबाट सामान्य मोटरसाइकल समेत आवतजावत गर्न सक्ने अवस्था छैन।
यसअघि सोमबार बिहानै कान्तिपुर पब्लिकेसन्स, अनलाइनखबर र हिमालय टेलिभिजनको मुख्य गेटमा पनि आउजाउ नै अवरुद्ध हुने गरी साँचो विनाका शंकास्पद गाडीहरू बेवारिसे रूपमा छाडिएका थिए। यातायात व्यवस्था विभागको दर्ता अभिलेख अनुसार कान्तिपुर अगाडि सानिमा बैंकको नाममा दर्ता रहेको बा प्रदेश ०१-०३-०३४ च ८४८०, अनलाइनखबर अगाडि सुनील पौडेलको नाममा रहेको बा १२ च ८५४५, र हिमालय टेलिभिजन अगाडि सुवास भण्डारीको नाममा दर्ता भएको बा १२ च १२५५ नम्बरको गाडी पार्किङ गरिएको खुलेको थियो।
एकै दिन सञ्चारगृह र प्रमुख राजनीतिक नेताको निवासलाई लक्षित गरी भएका यी रहस्यमय घटनाहरूले उपत्यकाको सुरक्षा व्यवस्था र नियोजित दबाब वा चेतावनीको रणनीतितर्फ गम्भीर प्रश्न खडा गरेको छ। घटनाको जानकारी पाउनासाथ खटिएको नेपाल प्रहरी र ट्राफिक प्रहरीको संयुक्त टोलीले क्रेनको सहयोगमा गाडीहरू हटाएर सीसीटीभी फुटेजसहित गम्भीर अनुसन्धान अघि बढाएको छ। यसैबीच, नेपाल पत्रकार महासंघले प्रेस स्वतन्त्रता र सञ्चारगृहको सुरक्षामाथि प्रहार गर्ने उद्देश्यले गरिएको यस नियोजित घटनाप्रति गम्भीर आपत्ति जनाउँदै दोषीमाथि तत्काल कानुनी कारबाही गर्न माग गरेको छ।
