काठमाडौं, साउन ७ । भूमि व्यवस्थापन तथा अभिलेख विभागले हदबन्दीभन्दा बढी जग्गा खरिद वा प्रयोग गर्न सरकारबाट स्वीकृति पाएका कम्पनी, उद्योग, प्रतिष्ठान तथा संघ-संस्थाहरूको स्थलगत अनुगमन तथा निरीक्षण गर्न देशभरका सम्बन्धित भूमि प्रशासन कार्यालयहरूलाई निर्देशन दिएको छ।
विभागले आज ४० जिल्लाका भूमि प्रशासन कार्यालयलाई पत्राचार गर्दै अनुगमन तथा निरीक्षण समितिले स्थलमै पुगेर वस्तुस्थितिको अध्ययन गरी यथाशीघ्र प्रतिवेदन बुझाउन भनेको हो। यसअघि पटक-पटक प्रतिवेदन माग गर्दा पनि अधिकांश कार्यालयबाट प्राप्त नभएपछि विभागले पुनः कडा निर्देशन जारी गर्नुपरेको जनाएको छ।
प्रचलित कानुनी व्यवस्थाअनुसार सरकारको स्वीकृतिमा हदबन्दीभन्दा बढी जग्गा प्राप्त गरेका उद्योग, कम्पनी, प्रतिष्ठान, आयोजना, शिक्षण संस्था तथा अन्य संघ-संस्थाले स्वीकृत उद्देश्यअनुसार नै जग्गा प्रयोग गरिरहेका छन् वा छैनन् भन्ने विषयमा स्थलगत छानबिन गर्नुपर्ने हुन्छ। तर, जिल्लास्थित कार्यालयहरूले प्रतिवेदन नपठाउँदा अनुगमन प्रभावित हुँदै आएको थियो।
