काठमाडौं, साउन ७ । ४४ औँ वीपी स्मृति दिवसका अवसरमा आयोजित कार्यक्रममा बोल्दै नेपाली कांग्रेसका सभापति गगनकुमार थापाले राजनीतिको परिभाषा र अभ्यास दुवै बदल्नुपर्नेमा जोड दिनुभएको छ।
उहाँका अनुसार राजनीति केवल सत्ता र शक्तिको प्रतिस्पर्धा मात्र नभई भत्किएका विद्यालय पुनर्निर्माण गर्ने, किसानका समस्या समाधान गर्ने, वातावरण संरक्षण गर्ने र रोजगारी सिर्जना गर्ने जस्ता सामाजिक कार्य हुनुपर्छ। कुनै एक चुनावको जित-हारले पार्टीको सिद्धान्तसँग सम्झौता नगर्ने स्पष्ट पार्दै उहाँले कांग्रेस सत्तासँग मात्र नभई पुनः समाज र नागरिकको विश्वाससँग जोडिनुपर्ने बताउनुभयो।
साथै, प्रधानमन्त्रीसहित सबै निकाय संविधानको दायराभित्र हुनुपर्नेमा जोड दिँदै थापाले अख्तियार दुरुपयोग अनुसन्धान आयोगलाई राजनीतिक हस्तक्षेपमुक्त, निष्पक्ष र प्रभावकारी बनाउन आवश्यक परे संविधान संशोधन तथा संरचनागत सुधार गर्न कांग्रेस तयार रहेको प्रतिबद्धता व्यक्त गर्नुभयो।
