काठमाडौं, साउन ३१ । पूर्वप्रधानमन्त्री तथा नेपाली कांग्रेसका नेता शेरबहादुर देउवाले आफू व्यक्तिगत रूपमा हिन्दू धर्ममा आस्था राख्ने भए पनि कुनै पनि धर्म वा समुदायको विरोधी नभएको बताएका छन्। पार्टीको संस्थापन इतर समूहद्वारा सुकेधारामा आयोजित तीनदिने राष्ट्रिय भेलाको समापन सत्रलाई सम्बोधन गर्दै देउवाले नेपालमा धार्मिक स्वतन्त्रता कायम रहनुपर्ने धारणा व्यक्त गरे।
“मैले गुह्येश्वरीमा हिन्दु विधिअनुसार विवाह गरेको हुँ। त्यसैले म व्यक्तिगत रूपमा पूर्ण रूपमा हिन्दु हुँ। कसैले मलाई हिन्दु होइन भन्न सक्दैन,” देउवाले भने। उनले नेपालमा कुन धर्म रहने वा नरहने भन्ने निर्णय नेपाली जनताको अधिकार भएको उल्लेख गर्दै आफू धार्मिक स्वतन्त्रताको पक्षमा रहेको बताए।
देउवाले हिन्दू भएकै कारण आफू अन्य धर्मको विरोधी नभएको स्पष्ट पारे। “म हिन्दु हुँ, तर म कुनै पनि धर्मको विरोधी होइन। न म क्रिश्चियनको विरोधी हुँ, न मुस्लिमको, न किराँत, राई, लिम्बु वा अन्य कुनै धर्म–समुदायको,” उनले भने। नेपालका सबै धर्मावलम्बीलाई आफ्नो धर्म मान्ने र अभ्यास गर्ने अधिकार रहेको उनको भनाइ थियो।
आफू पशुपतिनाथमा पूजा गर्न चाहने हिन्दू भएको उल्लेख गर्दै देउवाले बुद्धप्रति गहिरो श्रद्धा र सम्मान रहेको बताए। बौद्ध धर्मलाई विश्वले सम्मानका साथ स्वीकार गरेको उल्लेख गर्दै उनले राई, लिम्बुलगायत समुदायका प्रकृतिप्रतिको आस्था र परम्पराको पनि सम्मान गर्नुपर्ने धारणा राखे।
“क्रिश्चियनले आफूलाई क्रिश्चियन भन्न पाउँछ, मुस्लिमले आफूलाई मुस्लिम भन्न पाउँछ भने मैले पनि आफूलाई हिन्दु भन्न पाउनुपर्छ,” उनले भने। सबै धर्म, संस्कृति र समुदायप्रति सम्मानभाव राख्दै अघि बढ्नु नै नेपालको बहुलवादी समाजको विशेषता भएको उनको भनाइ थियो।
सम्बोधनका क्रममा देउवाले आफूले विभिन्न समुदायबाट पाएको माया, सद्भाव र विश्वासलाई कहिल्यै नबिर्सने उल्लेख गर्दै आगामी दिनमा पनि सबैको साथ र सद्भावलाई आत्मसात गर्दै अघि बढ्ने प्रतिबद्धता व्यक्त गरे।
