मकवानपुर, भदौ २ । मकवानपुरको भिमफेदी गाउँपालिका-६, जुरिखेतमा स्कोर्पियो दुर्घटना हुँदा उच्च अदालत जनकपुर, अस्थायी इजलास वीरगन्जका मुख्य न्यायधीशसहित चार जना गम्भीर घाइते भएका छन्। उनीहरूलाई थप उपचारका लागि नेपाली सेनाको हेलिकप्टरमार्फत काठमाडौँस्थित छाउनी अस्पताल लगिएको छ।
काठमाडौँबाट हेटौँडा जाँदै गरेको बा ३-००२ झ ५१८३ नम्बरको स्कोर्पियो अनियन्त्रित भई दुर्घटना हुँदा ६ जना घाइते भएका थिए।
घाइतेहरूको विवरण:
गोकर्ण डाँगी (५७ वर्ष) – मुख्य न्यायधीश, उच्च अदालत जनकपुर, अस्थायी इजलास वीरगन्ज (हेलिकप्टरमार्फत काठमाडौँ लगिएको)
तारादत्त बाडू (५१ वर्ष) – रजिस्ट्रार (हेटौँडा अस्पतालमा उपचार भइरहेको)
लक्ष्मी बाडू (४९ वर्ष) – रजिस्ट्रार बाडूकी पत्नी (हेलिकप्टरमार्फत काठमाडौँ लगिएको)
रितेन्द्र बाडू (२५ वर्ष) – रजिस्ट्रारका छोरा (हेलिकप्टरमार्फत काठमाडौँ लगिएको)
रीता बाडू (३१ वर्ष) – (हेलिकप्टरमार्फत काठमाडौँ लगिएको)
छुनीलाल चौधरी (३२ वर्ष) – चालक (हेटौँडा अस्पतालमा उपचार भइरहेको)
मकवानपुरका प्रहरी नायब उपरीक्षक (डिएसपी) माधवप्रसाद काफ्लेका अनुसार रजिस्ट्रार तारादत्त बाडू र चालक छुनीलाल चौधरी बाहेकका चार जनालाई सेनाको हेलिकप्टरमार्फत छाउनी अस्पताल, काठमाडौँ पठाइएको हो। बाडू र चौधरीको भने हेटौँडा अस्पतालमै उपचार भइरहेको छ।
