काठमाडौं, भदौ ३० । नेपाल राष्ट्र बैंकले आगामी दशैँ तथा तिहार पर्वलाई लक्षित गर्दै बैंक तथा वित्तीय संस्थाका एटीएम मेसिनहरूबाट अनिवार्य रूपमा रु. १०० दरका नोटसमेत निकाल्न सकिने व्यवस्था मिलाउन निर्देशन दिएको छ।
राष्ट्र बैंकको मुद्रा व्यवस्थापन विभागले ‘नेपाल बैंकर्स संघ’, ‘डेभलपमेन्ट बैंकर्स एसोसिएसन’ र ‘नेपाल वित्त कम्पनी संघ’लाई औपचारिक पत्राचार गर्दै मातहतका सबै बैंक तथा वित्तीय संस्थालाई सोही अनुसार एटीएम सेटिङ र नोट व्यवस्थापन गर्न भनेको हो।
चाडपर्वका समयमा साना दरका नोट (खुद्रा नोट) सटही गर्न बैंकका शाखा तथा काउन्टरहरूमा सर्वसाधारणको अत्यधिक भीडभाड हुने गरेको छ। राष्ट्र बैंकका सहायक प्रवक्ता सुधा शाहका अनुसार सोही भीडलाई नियन्त्रण गर्न र सर्वसाधारणलाई सहज तरिकाले खुद्रा नोट उपलब्ध गराउन यो कदम चालिएको हो।
यसअघि अधिकांश बैंक तथा वित्तीय संस्थाका एटीएमबाट रु. ५०० र रु. १,००० दरका नोट मात्रै निकाल्न सकिने सुविधा थियो। अब भने १०० रुपैयाँका नोट पनि एटीएमबाटै पाइन थालेपछि साना दरका नोटका लागि बैंकको काउन्टरमै पुगेर घण्टौँ लाइन बस्नुपर्ने बाध्यता हट्ने विश्वास राष्ट्र बैंकले लिएको छ।
