काठमाडौ, असोज ७ । संयुक्त राष्ट्रसंघका महासचिव एन्टोनियो गुटेरेसले जलवायु परिवर्तनको गम्भीर असरबारे चर्चा गर्दै नेपालका हिमनदी तीव्र गतिमा पग्लिरहेको विषयलाई विश्वसामु उठाएका छन्।
संयुक्त राष्ट्रसंघको ८१औँ महासभाको उद्घाटन सम्बोधनका क्रममा गुटेरेसले तीन वर्षअघि नेपालको हिमाली क्षेत्रमा पुगेर आफूले दिएको जलवायु चेतावनी स्मरण गर्दै हिमनदी पग्लिने क्रम तीव्र बन्दै गएको बताए।
उनका अनुसार जलवायु परिवर्तनका असरहरू अपेक्षा गरिएभन्दा छिटो, गम्भीर र व्यापक रूपमा देखिन थालेका छन्। उनले विश्व तापक्रम वृद्धिलाई १.५ डिग्री सेल्सियसको सीमाभित्र राख्ने प्रयास चुनौतीपूर्ण बन्दै गएको र चरम मौसमी घटनाहरू बढिरहेको उल्लेख गरे।
गुटेरेसले जलवायु संकटबाट सबैभन्दा बढी प्रभावित मुलुकलाई सहयोग गर्न अनुकूलन वित्त बढाउनुपर्नेमा जोड दिँदै विकसित राष्ट्रहरूलाई आफ्नो वित्तीय प्रतिबद्धता थप बलियो बनाउन आग्रह गरे।
साथै, उनले जीवाश्म इन्धनको प्रयोग क्रमशः घटाउँदै स्वच्छ ऊर्जातर्फ न्यायपूर्ण र तीव्र संक्रमण आवश्यक रहेको बताए। हिमाली तथा जलवायु जोखिममा रहेका नेपालजस्ता मुलुकले भोगिरहेको वातावरणीय क्षतिको जिम्मेवारी प्रमुख प्रदूषक राष्ट्रहरूले लिनुपर्ने उनको भनाइ थियो।
