काठमाडौं, कात्तिक १२ । नेपाल प्रिमियर लिग (एनपीएल) अन्तर्गत बिहीबार दुई खेल हुँदैछन्। पहिलो खेलमा जनकपुर बोल्ट्स र काठमाडौं गुर्खाज दिउँसो १२:३० बजे भिड्नेछन् भने दोस्रो खेलमा कर्णाली याक्स र विराटनगर किङ्सबीच साँझ ५ बजे प्रतिस्पर्धा हुनेछ।
प्रतियोगिताको पहिलो खेलमा पराजित भएका जनकपुर र काठमाडौं बिहीबार जितको खोजीमा मैदान उत्रनेछन्। दुवै टोलीका लागि यो खेल प्रतियोगितामा पुनरागमन गर्ने महत्त्वपूर्ण अवसर हुनेछ।
पहिलो संस्करणको च्याम्पियन जनकपुरले आफ्नो पहिलो खेलमा कर्णालीसँग १९ रनको हार बेहोरेको थियो। त्यस्तै, काठमाडौं लुम्बिनी लायन्ससँग पराजित भएको थियो। हरमित सिंहको कप्तानीमा रहेको जनकपुरमा मोइन अली, इफ्तिखार अहमद र जिम्मी निशमजस्ता अनुभवी खेलाडी छन्। उता, करण केसीको नेतृत्वमा रहेको काठमाडौंमा डेभिड वार्नर र केएस भरतजस्ता खेलाडी छन्।
दिनको दोस्रो खेलमा कर्णाली याक्सले विराटनगर किङ्सको सामना गर्नेछ। पहिलो खेलमा जनकपुरलाई हराएको कर्णाली लगातार दोस्रो जित निकाल्ने लक्ष्यमा छ।
सोमपाल कामीको कप्तानीमा रहेको कर्णालीका लागि विराटनगरविरुद्धको खेल आफ्नो लय कायम राख्ने अवसर हुनेछ। अर्कोतर्फ, विराटनगर पहिलो खेलमा चितवन राइनोजसँग आठ रनले पराजित भएको थियो। सन्दीप लामिछानेको कप्तानीमा रहेको विराटनगर पहिलो जित निकाल्दै प्रतियोगितामा फर्कन चाहन्छ।
दुवै खेलमा चारै टोलीका लागि महत्त्वपूर्ण अंक दाउमा छन्। जनकपुर र काठमाडौं पहिलो जितको खोजीमा रहँदा कर्णाली जितको लय कायम राख्न र विराटनगर पुनरागमन गर्न मैदान उत्रनेछन्।
