काठमाडौँ, २५ पुस ।
नेपाल आयल निगमले हवाई इन्धनको मूल्य घटाएसँगै आन्तरिक हवाई भाडा पनि घट्ने भएको छ । घटेको हवाई भाडा पुस २७ गतेदेखि लागू हुने वायुसेवा सञ्चालक संघले जनाएको छ ।
हवाई इन्धनमा बढी नाफा राख्दा यात्रुले आन्तरिक र बाहृय उडानका लागि महँगो शुल्क तिर्नुपरेको थियो । हवाई इन्धनमा चर्को शुल्क लिएको भन्दै चौतर्फी आलोचना भएपछि आइतबार आकस्मिक बसेको सञ्चालक समितिको बैठकले मूल्य घटाउने निर्णय गरेको हो । अब आन्तरिकतर्फ हवाई इन्धनको मूल्य १७० रुपैयाँ कायम भएको छ ।
सबैभन्दा धेरै काठमाडौं–धनगढी रुटको भाडा ८८५ रुपैयाँले घटेको छ। यसअघि उक्त रुटमा यात्रुहरुले ८ हजार ३९५ रुपैयाँ भाडा तिर्दै आएकोमा अब ७ हजार ५१० रुपैयाँ तिरे पुग्नेछ। यससँगै उक्त रुटको फूल फेयर ९अधिकतम० भाडा १६ हजार १४० मा झरेको छ । काठमाडौंदेखि माउन्टेन फ्लाइटको भाडा ६८५ रुपैयाँले घटेर ५ हजार ८३५ रुपैयाँ कायम भएको छ ।
काठमाडौंदेखि भद्रपुर रुटको भाडा ६००, काठमाडौं–विराटनगर ४८५, काठमाडौं–जनकपुर २६०, काठमाडौं–भरतपुर २१५, र काठमाडौं पोखरा रुटको भाडा ३२० रुपैयाँले घटेको छ । काठमाडौं–भैरहवा ४१०, काठमाडौं–नेपालगञ्ज ६५५, काठमाडौं तुम्लिङटार ३७०, काठमाडौं–सिमरा १८०, काठमाडौं सुर्खेत ६९० र काठमाडौं–राजविराज रुटको भाडा ४११ रुपैयाँले घटेको छ ।
नेपाल आयल निगमले हवाई इन्धनको मूल्य प्रतिलिटर ३० रुपैयाँसम्म घटाएको छ । निगम सञ्चालक समितिको आइतबार बसेको बैठकले हवाई इन्धन आन्तरिकतर्फ २० र बाह्यतर्फ करिब ३० रुपैयाँ घटाउने निर्णय गरेको हो । नयाँ मूल्यअनुसार हवाई इन्धन आन्तरिकतर्फ प्रतिलिटर १७० रुपैयाँ पर्नेछ । यसअघि प्रतिलिटर १९० रुपैयाँ थियो । त्यस्तै, हवाई इन्धन बाह्यतर्फ प्रतिलिटर १८७ रुपैयाँ ८५ पैसा ९१।४२ अमेरिकी डलर० पर्ने जनाएको छ । यसअघि प्रतिलिटर २१७ रुपैयाँ २४ पैसा थियो । हवाई इन्धनको मूल्य भारी घटे पनि निगमलाई अझै आन्तरिकतर्फ लिटरमा २० र बाह्यतर्फ ७० रुपैयाँ नाफा छ ।
