काठमाडौं । आगामी फागुन २१ गते हुने प्रतिनिधि सभा निर्वाचनका लागि पहिलो हुने निर्वाचित हुने (प्रत्यक्ष) निर्वाचन प्रणालीतर्फ मनोनयन दर्ता गराएका उम्मेदवारहरू विरुद्ध आज उजुरी दिन सकिने भएको छ। निर्वाचन आयोगले तय गरेको कार्यतालिका अनुसार आज (बुधबार) उम्मेदवारको योग्यता वा अन्य विषयमा दाबी विरोधका लागि समय तोकिएको हो।
निर्वाचन आयोगले तय गरेको कार्यतालिका अनुसार आज मनोनयन दर्ता भएका उम्मेदवारहरू विरुद्ध उजुरी दिने समय तोकिएको छ। प्राप्त उजुरीहरूमाथि माघ ८ गते विस्तृत जाँचबुझ गरी सोही दिन उम्मेदवारहरूको नामावली प्रकाशन गरिनेछ। त्यसैगरी, उम्मेदवारी फिर्ता लिन चाहनेहरूका लागि माघ ९ गते बिहान १० बजेदेखि दिउँसो १ बजेसम्मको समय सीमा निर्धारण गरिएको छ। उम्मेदवारी फिर्ताको प्रक्रिया सकिएलगत्तै सोही दिन (माघ ९ गते) दिउँसो ४ बजेदेखि साँझ ७ बजेसम्म उम्मेदवारहरूलाई उनीहरूको निर्वाचन चिह्न प्रदान गरिने आयोगले जनाएको छ।
झण्डै ३ हजारको उम्मेदवारी
निर्वाचन आयोगका सचिव कृष्णबहादुर राउतका अनुसार देशभरका १६५ निर्वाचन क्षेत्रमा हालसम्म कुल २ हजार ९२५ जनाले उम्मेदवारी दर्ता गराएका छन्। मनोनयन प्रक्रिया देशभरका मुख्य निर्वाचन अधिकृत र निर्वाचन अधिकृतका कार्यालयहरूमा उत्साहजनक र शान्तिपूर्ण रूपमा सम्पन्न भएको आयोगले जनाएको छ।
कार्यवाहक प्रमुख निर्वाचन आयुक्त रामप्रसाद भण्डारीले मनोनयन कार्य सफलतापूर्वक सम्पन्न भएकामा सबै राजनीतिक दल र सरोकारवालाहरूलाई धन्यवाद व्यक्त गर्नुभएको छ। उहाँले निर्वाचनका बाँकी प्रक्रियामा पनि सबैको रचनात्मक सहयोग रहने अपेक्षा गर्नुभएको छ।
फागुन २१ गते हुने मतदानका लागि आयोगले सुरक्षा र व्यवस्थापकीय तयारीलाई तीव्र पारेको छ।
