काठमाडौं, साउन ६ । प्रधानमन्त्री वालेन्द्र शाहले नेपालको हस्तकला व्यवसायको विकास, विस्तार र संरक्षणका लागि सरकार प्रतिबद्ध रहेको बताउनुभएको छ।
नेपाल हस्तकला व्यवसायी महासंघका प्रतिनिधिमण्डलसँग आज प्रधानमन्त्री तथा मन्त्रिपरिषद्को कार्यालयमा भएको छलफलमा प्रधानमन्त्री शाहले हस्तकला क्षेत्रलाई प्राथमिकतामा राखेर आवश्यक नीति निर्माण गरिने बताउनुभयो। उहाँले हस्तकला व्यवसायमार्फत रोजगारी सिर्जना, परम्परागत सीपको पुस्तान्तरण तथा मौलिक कला–संस्कृतिको संरक्षणमा सरकार दृढ रहेको उल्लेख गर्नुभयो।
छलफलका क्रममा महासंघले सार्वजनिक–निजी साझेदारी (पीपीपी) मोडलमा हस्तकला विकास बोर्ड गठन, हस्तकला दिवसलाई राष्ट्रिय रूपमा मनाउने, हस्तकला सामग्री निर्यातमा बिजक मूल्यांकन अनिवार्य गर्ने, काठमाडौं उपत्यकामा हस्तकला ग्राम स्थापना गर्ने तथा सातै प्रदेशमा सीपमूलक प्रशिक्षण केन्द्र सञ्चालन गर्नुपर्ने माग राखेको थियो।
महासंघका ती मागप्रति प्रधानमन्त्री शाहले सकारात्मक प्रतिक्रिया जनाउँदै हस्तकला क्षेत्रको प्रवर्द्धन र सुदृढीकरणका लागि आवश्यक पहल गर्न सरकार तयार रहेको बताउनुभएको छ।
