काठमाडौं, साउन २६ । नेपाल क्रिकेट संघ (क्यान)ले नेपाली राष्ट्रिय क्रिकेट टोलीको एकदिवसीय कप्तानको जिम्मेवारी पुनः सन्दीप लामिछानेलाई दिएको छ।
क्यानले रोहित पौडेललाई कप्तानीबाट हटाउँदै लामिछानेलाई आगामी एसीसी मेन्स प्रिमियर कपका लागि नेपाली ओडीआई टोलीको नेतृत्व सुम्पिएको हो। प्रतियोगिता अगस्ट ३० देखि सेप्टेम्बर १२ सम्म मलेसियामा हुँदैछ।
यसअघि क्यानले टी–२० टोलीको कप्तानी दीपेन्द्रसिंह ऐरीलाई दिएको थियो। अब रोहित पौडेलले ओडीआई र टी–२० दुवैको कप्तानी गुमाएका छन्।
लामिछाने करिब चार वर्षपछि पुनः नेपाली टोलीको कप्तान बनेका हुन्। वि.सं. २०७९ मा विवादपछि कप्तानीबाट हटाइएका उनी अदालतबाट सफाइ पाएपछि राष्ट्रिय टोलीमा फर्किएका थिए। अब क्यानले उनलाई पुनः नेतृत्वको जिम्मेवारी दिएको हो।
प्रिमियर कपका लागि घोषित टोलीमा आसिफ शेख, अर्जुन कुमाल, रोहित पौडेल, देव खनाल, दीपेन्द्रसिंह ऐरी, सन्दीप जोर, बशीर अहमद, ईशान पाण्डे, गुल्सन झा, शेर मल्ल, ललित राजवंशी, करण केसी र हेमन्त थामी रहेका छन्।
कप्तानीमा सन्दीपको पुनरागमनसँगै नेपाली क्रिकेटमा नयाँ अध्याय सुरु भएको छ।
