काठमाडौं, असोज ६ । सोमबार काठमाडौंको त्रिपुरेश्वरमा बसमा आगलागी हुँदा गम्भीर घाइते भएका चालकको कीर्तिपुरस्थित बर्न अस्पतालमा उपचारका क्रममा निधन भएको छ।

Advertisement

रिद्धि सिद्धि यातायातको बा ५ ख ४२७४ नम्बरको बसमा त्रिपुरेश्वर चोकमा आगलागी भएको थियो। सामाजिक सञ्जालमा भाइरल भएको भिडियोमा आगलागी हुनुअघि चालकको ट्राफिक प्रहरीसँग विवाद भएको देखिएको छ।

अस्पतालका अनुसार चालकको शरीर ९० प्रतिशत जलेको थियो। यसअघि प्रहरीले उनको नाम दावा लामा बताए पनि वास्तविक नाम अर्जुन दोङ रहेको खुलेको छ। यद्यपि, उनको आधिकारिक पहिचान भने अझै पूर्ण रूपमा पुष्टि हुन बाँकी रहेको जनाइएको छ।

प्रहरीको प्रारम्भिक अनुसन्धान अनुसार चालक आफैले बसमा आगो लगाएका थिए। घटनाबारे काठमाडौं जिल्ला प्रशासन कार्यालय र प्रहरीले छुट्टाछुट्टै अनुसन्धान गरिरहेका छन्।