प्रमुख चाडहरुको बिदाईसँगै निर्वाचन केन्द्रित चुनावी गतिविधिहरु तीब्र बन्न थालेका छन् । सिंगो देश अब चुनावी माहोलमा रंगिन थालेको छ । नेपालीहरुका महान चाड दशैँ, तिहार र छठले अर्को वर्ष भेट्ने गरी नेपाली समाजबाट बिदा मागिसके । अब आमनिर्वाचनमा आफ्नो उम्मेदवारलाई विजयी बनाउन दलीय र स्वतन्त्र उम्मेदवारका समर्थक, शुभचिन्तक जुटेका छन् । चाडपर्वकै बीचमा पनि जारी रहेको घरदैलोले तीब्रता पाउन थालेको छ ।
निर्वाचन आउन करिब तीन साता बाँकी छ । प्रतिनिधिसभा र प्रदेशसभा सदस्य पदका उम्मेदवारहरुसँग चुनाव प्रचारका लागि अब धेरै समय बाँकी छैन । चार दिनपछि मात्र निर्वाचन केन्द्रित आमसभा र कोणसभा गर्न पाइने भएकोले यो चार दिन उम्मेदवारहरुले घरदैलो र मतदाता भेटघाटमै बिताउने छन् ।
आगामी शनिबारदेखि आमसभा र कोणसभा सुरु भएसँगै निर्वाचनको सरगर्मी ह्वात्तै बढ्नेछ । यी सभामा उम्मेदवारहरु आरोप–प्रत्यारोपमा उत्रिनुभन्दा पनि आफ्ना चुनावी एजेण्डा जनतालाई बुझाएर भोलि आफू निर्वाचित भएर गएपछि गर्ने काम र प्रतिबद्धता सार्वजनिक गर्नु महत्वपूर्ण हुनेछ । अर्को उम्मेदवारलाई गाली गरेर होइन, आफूले आफ्नो क्षेत्रको लागि यस्तो काम गर्नेछु भनेर सार्वजनिक गर्नु नै उचित हुनेछ ।
पुराना अनुहारबाट आजित भएका जनताले यसपटक नयाँ अनुहार खोजिरहेका छन् । परम्परागत हिसाबले मतदान गर्दै आएका चितवनका मतदाताले यसपटक मतदान भिन्न तरिकाले गर्न खोजेको आँकलन गरिएको छ । त्यसैले चुनावको अन्तिम परिणाम यसै हुन्छ भन्न सकिँदैन । त्यसका लागि मंसिर ४ गते र त्यसपछिको एक साता कुर्नै पर्छ ।
नयाँ अनुहार खोजेका मतदाताको मनोभावना बुझेर प्रतिनिधिसभा सदस्यतर्फ सत्ता गठबन्धनले चितवनका तीन क्षेत्रमै नयाँ अनुहार पेश गरेको छ । चितवन १ बाट काँग्रेसका विश्व पौडेल, चितवन २ बाट काँग्रेसकै उमेश श्रेष्ठ र चितवन ३ बाट नेकपा माओवादी केन्द्रका डा. भोजराज अधिकारी नयाँ अनुहार हुन् । पौडेल राष्ट्रिय योजना आयोगको उपाध्यक्ष भइसकेका व्यक्ति हुन् । बहालवाला राज्यमन्त्री श्रेष्ठ प्रतिनिधिसभा सदस्यमा प्रत्यक्षतर्फबाट पहिलोपटक उम्मेदवार बनेका हुन् । यसअघि उनी समानुपाति सांसद थिए । भरतपुर अस्पतालको अध्यक्ष भइसकेका डा. अधिकारी भने राजनीतिका लागि बिल्कुल नयाँ अनुहार हुन् ।
सत्ता गठबन्धनसँग टक्कर लिने हैसियत भएको प्रमुख प्रतिपक्ष नेकपा एमालेले चितवन ३ मा उम्मेदवारी दिएको छैन । एमालेले चितवन १ मा सुरेन्द्र पाण्डे र २ मा कृष्णभक्त पोखरेललाई उम्मेदवार बनाएको छ, यी दुवै पुराना अनुहार हुन् ।
आगामी मंसिर ४ गते नेपालका ७७ जिल्लामा तोकिएका मतदान केन्द्रबाट जनताले गोप्य मतदान गर्नेछन् । प्रतिनिधिसभा सदस्यतर्फ १६५ पदका लागि प्रत्यक्ष भोट र समानुपातिकतर्फ ११० सिटका लागि पनि समानुपातिक भोट दिनुपर्नेछ । प्रदेशसभातर्फ ३३० पदका लागि प्रत्यक्ष र अन्य बाँकी सिटका लागि समानुपातिक भोट दिनुपर्नेछ ।
एउटा मतदाताले चार वटा मतपत्रमा मत संकेत गर्नुपर्नेछ । पहिलो मतपत्र प्रतिनिधिसभा सदस्य प्रत्यक्षतर्फका उम्मेदवारको हुनेछ । अर्को मतपत्र प्रदेशसभा सदस्य प्रत्यक्षतर्फको उम्मेदवारको हुनेछ । तेस्रो र चौथो मतपत्र क्रमशः प्रतिनिधिसभा र प्रदेशसभा सदस्यका लागि ती सदस्यको नाम बन्दसूचीमा राखेको पार्टीलाई दिनुपर्नेछ । यसरी चार वटा अलगअलग मतपत्रमा मत संकेत गरेपछि मतदानको काम सकिने छ । मतदान सकिएपछि मतपेटिकालाई सुरक्षित स्थानमा केन्द्रीकृत गरी मुचुल्काको काम भ्याएपछि मतगणना प्रारम्भ हुनेछ । अबको करिब एक महिनामा देशभरका सबैजसो नतिजा आइपुग्ने अनुमान गरिएको छ ।
