भरतपुर- भरतपुर महानगरपालिका–१२ मा नेपाल अर्बुद रोग निवारण संस्था, चितवन शाखा, हंस बहुउद्देश्यीय सहकारी संस्था लि. नारायणगढ, तथा लायन्स क्लब अफ भरतपुर चौतारीको आयोजनामा एकदिने निःशुल्क स्वास्थ्य परीक्षण तथा पाठेघरको मुखको क्यान्सर परीक्षण शिविर सम्पन्न भएको छ। शिविरमा बीपी कोइराला मेमोरियल क्यान्सर अस्पताल, भरतपुरका प्राविधिक टोलीले महिलाहरूको निःशुल्क क्यान्सर परीक्षण गरेका थिए। साथै, सिर्जनशील टोल विकास संस्था, सिद्धिविनायक आमा समूह तथा सिद्धिविनायक गणेश मन्दिर व्यवस्थापन समितिको विशेष सहयोग रहेको थियो।
शिविरमा २०० जनाले निःशुल्क स्वास्थ्य परीक्षण गराएका थिए भने ७५ जना महिलाले पाठेघरको मुखको क्यान्सर परीक्षण गराएका थिए। कार्यक्रममा स्थानीय समुदायको उल्लेख्य सहभागिता रहेको थियो।
कार्यक्रमको अध्यक्षता हंस बहुउद्देश्यीय सहकारी संस्था लिमिटेडका अध्यक्ष तथा नेपाल अर्बुद रोग निवारण संस्था, चितवन शाखाका निवर्तमान सभापति दिनेश कुमार चुकेले गर्नुभएको थियो। प्रमुख अतिथि भरतपुर महानगरपालिका वडा नं। १२ का वडा अध्यक्ष लेखराज पन्त हुनुहुन्थ्यो। विशिष्ट अतिथिका रूपमा लायन्स क्लब अफ भरतपुर चौतारीका पूर्व अध्यक्ष तथा आशा अस्पताल, भरतपुरका डाइरेक्टर डा। शरद कुँवर रहनुभएको थियो। कार्यक्रमका संयोजक हंस बहुउद्देश्यीय सहकारी संस्था लिमिटेडका उपाध्यक्ष तथा सृजनशील टोल विकास संस्थाका अध्यक्ष बाबुराम अधिकारी हुनुहुन्थ्यो।
कार्यक्रमका अध्यक्ष दिनेश कुमार चुकेले सहकारी संस्थाहरू सामाजिक उत्तरदायित्वका कार्यक्रमहरूमा सक्रिय हुनुपर्ने बताउँदै स्वास्थ्य जाँच तथा सचेतना कार्यक्रमहरू सहकारीहरूको महत्वपूर्ण सामाजिक दायित्व भएको उल्लेख गर्नुभयो। प्रमुख अतिथि वडा अध्यक्ष लेखराज पन्तले नागरिकहरूको स्वास्थ्य सुरक्षामा सहकारी र संघसंस्थाहरूको भूमिका उल्लेखनीय रहेको भन्दै प्रारम्भिक जाँचबाट गम्भीर रोगहरूको समयमै पहिचान गरेर उपचार थाल्न सकिने बताउनुभयो।
डा। शरद कुँवरले पाठेघरको मुखको क्यान्सर महिलाहरूका लागि गम्भीर समस्या भएको उल्लेख गर्दै महिलाहरूले समयमै परीक्षण गराउनु अत्यावश्यक रहेको बताउनुभयो। बीपी कोइराला मेमोरियल क्यान्सर अस्पतालका वरिष्ठ नर्सिङ सुपरभाइजर अयोध्या पाठकले सहकारी संस्था र सामाजिक संघसंस्थाहरूले स्वास्थ्य सचेतना अभिवृद्धिमा पुर्याइरहेको योगदानको प्रशंसा गर्दै निःशुल्क परीक्षण कार्यक्रमहरूले दीर्घकालीन स्वास्थ्य सुरक्षामा सहयोग पुर्याउने बताउनुभयो।
कार्यक्रमका संयोजक बाबुराम अधिकारीले स्वागत मन्तव्य राख्दै हंस बहुउद्देश्यीय सहकारी संस्था केवल वित्तीय कारोबारमा मात्र सीमित नरहेको भन्दै सामाजिक सेवामा समेत सक्रिय रहेको बताउँदै आगामी दिनहरूमा यस्ता कार्यक्रमहरू थप प्रभावकारी रूपमा अघि बढाइने उल्लेख गर्नुभयो।
कार्यक्रम सञ्चालन हंस बहुउद्देश्यीय सहकारी संस्था लिमिटेडका सचिव तथा नेपाल अर्बुद रोग निवारण संस्था, चितवन शाखाका सचिव शारदा शर्मा पौडेलले गर्नुभएको थियो। कार्यक्रममा विभिन्न संघसंस्थाका प्रतिनिधिहरू, स्वास्थ्यकर्मी तथा स्थानीय नागरिकहरूको उत्साहजनक सहभागिता रहेको थियो।
