काठमाडौं, माघ २९ । विमानस्थलको सुरक्षा संवेदनशीलतालाई ध्यानमा राख्दै काठमाडौँ जिल्ला प्रशासन कार्यालयले त्रिभुवन अन्तर्राष्ट्रिय विमानस्थल वरपरका क्षेत्रमा एक महिनाका लागि निषेधाज्ञा जारी गरेको छ।
विभिन्न राजनीतिक दल र समूहहरूले फागुन २ गते विमानस्थल केन्द्रित विरोध प्रदर्शन गर्ने तयारी गरेपछि सुरक्षा व्यवस्था कडा पार्न यो कदम चालिएको हो। प्रमुख जिल्ला अधिकारी ईश्वरराज पौडेलद्वारा जारी आदेश अनुसार विमानस्थलको मुख्य प्रवेशद्वार देखि आन्तरिक तथा अन्तर्राष्ट्रिय टर्मिनल भवन, पार्किङ र भित्री सडकहरूमा ५ जनाभन्दा बढी व्यक्ति भेला हुन, अनसन, धर्ना, जुलुस वा कुनै पनि प्रकारका सभा-सम्मेलन गर्न पूर्ण रूपमा रोक लगाइएको छ।
प्रशासनले विमानस्थललाई अत्यन्तै संवेदनशील क्षेत्र मान्दै त्यहाँ हुने भिडभाड वा प्रदर्शनले हवाई सेवा अवरुद्ध हुनुका साथै तोडफोड वा आगजनीको जोखिम बढ्न सक्ने जनाएको छ। नागरिकको अभिव्यक्ति स्वतन्त्रता र शान्तिपूर्ण भेला हुन पाउने संवैधानिक हकको सम्मान गर्ने स्पष्ट पार्दै प्रशासनले निषेधित क्षेत्र बाहिर गरिने प्रदर्शनमा बाधा नपुऱ्याइने बताएको छ। तर, आन्दोलनका क्रममा सरकारी वा निजी सम्पत्तिमा क्षति पुगेमा त्यसको जिम्मेवारी सम्बन्धित आयोजकले नै लिनुपर्ने र सोही बमोजिम कारबाही हुने चेतावनी समेत दिइएको छ।
