काठमाडौँ, फागुन १३ । ‘राष्ट्र, राष्ट्रियता, धर्म, संस्कृति तथा नागरिक बचाउ महाअभियान’का संयोजक दुर्गा प्रसाईं हिरासतबाट रिहा भएका छन्। सर्वोच्च अदालतको आदेशसँगै उनलाई आज प्रहरी हिरासतबाट मुक्त गरिएको हो।
मंगलबार सर्वोच्च अदालतका न्यायाधीशद्वय मनोजकुमार शर्मा र मेघराज पोखरेलको इजलासले प्रसाईंलाई गैरकानुनी रूपमा थुनामा राखिएको ठहर गर्दै तत्काल रिहा गर्न परमादेश जारी गरेको थियो। प्रसाईंकी पत्नी उमा प्रसाईंले गत हप्ता जिल्ला प्रहरी परिसरमा आफ्नो पतिलाई गैरकानुनी रूपमा राखिएको दाबी गर्दै बन्दी प्रत्यक्षीकरण रिट दायर गरेकी थिइन्।
आगामी निर्वाचन बिथोल्ने गतिविधिमा संलग्न रहेको आरोप लगाउँदै निर्वाचन आयोगले प्रसाईंविरुद्ध कारबाहीका लागि प्रहरीलाई पत्राचार गरेको थियो। सोही आधारमा प्रहरीले उनलाई गत फागुन ४ गते काठमाडौँबाट पक्राउ गरेको थियो।
सर्वोच्चले मंगलबार नै रिहा गर्न आदेश दिए पनि आवश्यक कानुनी प्रक्रिया र प्रशासनिक औपचारिकता पूरा गर्न समय लागेका कारण उनलाई आज मात्रै रिहा गरिएको हो।
