चितवन, फागुन २९ । चितवनमा सफल व्यवसायीको छवि बनाएका युवा उद्यमी अर्जुन सुनार अब फिल्म निर्माण र अभिनयमा पनि छाउने तयारीमा छन्। बहुप्रतिक्षित नेपाली फिल्म ‘राम नाम सत्य’ को टिजर सार्वजनिक भएसँगै निर्माण पक्षमा जोडिएका सुनारको चर्चा फिल्म वृत्तमा चुलिएको हो।
निर्देशक माइकल चन्दको निर्देशनमा तयार भएको यस फिल्ममा महानायक विराज भट्टको दमदार एक्सन अवतारले दर्शकको ध्यान तानेको छ। तर, फिल्मको पर्दा पछाडिको अर्को बलियो खम्बाका रूपमा युवा व्यवसायी अर्जुन सुनार उभिएका छन्। व्यवसायको व्यस्त कार्यतालिकाका बाबजुद फिल्म निर्माणमा हात हाल्नुलाई उनले केवल मनोरञ्जन मात्र नभई, सिर्जना र सम्भावनाको नयाँ यात्राका रूपमा लिएका छन्।
फिल्मको सार्वजनिक टिजरमा अर्जुन सुनारलाई छोटो तर निकै आकर्षक ‘डन’ अवतारमा देख्न सकिन्छ। निर्माणसँगै उनको यो उपस्थितिले उनीभित्र लुकेको कलाकारिताको झझल्को समेत दिएको छ। सरल स्वभाव र स्पष्ट सोचका धनी सुनार कम बोल्ने तर कामबाटै आफ्नो पहिचान बनाउन विश्वास राख्छन्।
“सफलता एक्लै प्राप्त गर्ने वस्तु होइन, यो एक यस्तो यात्रा हो जहाँ सम्भव भएसम्म अरूलाई पनि सँगै अघि बढाउनुपर्छ,” भन्ने मान्यता राख्ने सुनारले युवा पुस्तामा सकारात्मक सोच र ऊर्जा भर्ने प्रयास गरिरहेका छन्।
राजेन्द्र आचार्य लाइन प्रोड्यूसर रहेको यस फिल्ममा विराज भट्टका साथै सुनिल थापा, सुशील श्रेष्ठ, दीव्या रायमाझी, सुपुष्पा भट्ट, चर्चित टिकटकर आयुष सिंह ठकुरी, प्रशान्त ताम्राकार र खुशी कार्की लगायतका दिग्गज कलाकारहरूको अभिनय रहेको छ। फिल्ममा बाबुल गिरी, अर्जुन पोखरेल, एसडी योगी र नवा अन्सारीको संगीत रहेको छ।
एक्सन, सस्पेन्स, प्रेम र थ्रिलको सम्मिश्रण रहेको ‘राम नाम सत्य’ आगामी चैत्र २७ गते देखि देशभरका हलहरूमा प्रदर्शन हुँदैछ। यो फिल्म केवल एउटा कथा मात्र नभई, एक सफल युवा व्यवसायीको सिर्जनात्मक सपनाको सुरुवात समेत मानिएको छ।
